Aizawl FC-in RG Stadium hmun nuamah a chantir

RG Stadium grass thara I League match hmasa bera Aizawl FC an mualpho hnuah Mizo club-in harhtharna ropui an lantir a, Thawhlehni zan khan B. Malsawmzuala hote hian Punjab club Namdhari FC chu 3-0 in an sawp.

AFC tan hian Lalrinzuala'n first half-ah goal hmahruai a khung a, second half-ah K. Lalrinfela leh R. Lalthanmawia ten an khung belh. Mizo club tan Mizo tlangvalte an che ṭha a, Mizo mipui an lawm. Aizawl FC-in inkhel result hmangin RG Stadium chu hmun nuamah an chantir.

Boruak a nuam

Zan boruak khawthiang ṭha tak hnuaia inkhel a ni bawk a, inkhel entu an tam ta hle. Delhi FC laka an chak loh ṭumah Aizawl FC-in ṭantu an nei meuh lo a, Namdhari hmachhawn ṭumah erawh 1000 chuang an pung khawm. Ticket an siam tam loh bawk avangin ticket an hralh zo vek.

Mahse, inkhel en man hi Rs 200 a ni a, ni tina inhlawh tan chuan en man a to hret. Aizawl FC hian en man titlawmin ticket siam tam zawk se, mipui an tam zawk ang a, inkhel en pawh a nuam lehzual ang.

Mizo club hian December 16 leh December 21 zanah Gokulam Kerala leh Inter Kashi te an mikhual leh dawn a, Aizawl FC-in ruahmanna ṭha an neih phawt chuan Krismas vuakvet a nih chhoh tawh dawn avangin entu an tam khawp ang.

Rinzuala phawt

Aizawl FC leh Namdhari FC ten foreinger pahnih ve ve an nei a, coach Sawmtea'n a sawi lawk angin foreigner pahnih tlarhnungah a rawn dintir. Namdhari lamin Mizo tlarhnung an rum ṭhaih hmasa a, an goal khung chu offside vangin pawm a ni lo.

Sreenidi Deccan leh Neroca an hneh ṭuma khel ṭha Brazilian defender Gustavo a inhliam a, minute 16-na lekah Lalmuanawma (Munez) a rawn lut. Munez-a rawn che ṭha a, defensive midfield hna chelhtu Lalthankhuma (TK-a) pawhin a hun ṭha neih a hmang ṭha viau bawk.

First half-ah Aizawl FC an chungnung bik lo a, team pahnih danglamna erawh Rinzuala a ni. Ramdinthara (Tharpuia) hmangin mual dinglamah Aizawl FC an hlauhawm ṭhin a, mual dinglam aṭangin first half-ah goal an khung.

Tharpuia ball pass ṭha chu box chhungah TK-a'n a chang a, Cherhlun tlangval ball pek chu Rinzuala'n box chhungah changin minute 42-naah goal hmahruai a khung. First half-ah 1-0 a ni a, Aizawl FC player bakah anmahni ṭantu mipui an phur hle.

Goal ropui chu

Namdhari-in insiamṭhat tumin halftime-ah player an thlak a, Aizawl FC erawhin inhliam vangin Rinzuala an la chhuak thung. Mizo club-in goal venhim an ngai pawimawh hmasa a, chutihrualin mual laia inkhel thunun tumin an thawkrim bawk.

Minute 71-naah Joe Zoherliana cross chu Hnahthial tlangval Mafela'n a tauh lut a, Mizo club-in point thum an hnaih sawt. Punjab club a kaw tawpah an ṭang a, Mizo club-in goal venhim hna an thawk a, chutihrualin counter attack-ah erawh Mizo club an hlauhawm ṭhin hle.

Injury time minute nga pek belh a ni a, minute nganaah AFC-in freekick an hmu a, pet goal nan a hla mah mah. Mahse, Lamzawl tlangval Amawia'n a theihna a hre chiang a, inringtawk takin kawh zetin goal-ah a pet. Namdhari keeper Tenzin Samdup tan dah ngaihna a awm lo a, inkhel entu mipuiin goal ropui an hmu. Amawia a insum zo lo a, yellow card chawi huamin a kawr a phelh a, Lamzawl tlangval thil tih hi dem theih a ni lo–a goal khung hi a ropui em a ni.