Coleman-a'n player-te khuahkhirh dawn

Wales manager Chris Coleman chuan Euro 2016 khel tura an inbuatsaihna kawngah a player-te a khuahkhirh tur thu sawiin Wales team hotel-ah player-te nupui leh an bialnute kal a phal dawn lo.

Coleman chuan an inkhuahkhirhna dan chu a player-te tan chauh a nih loh thu sawiin ama tan pawh a nih thu a sawi a, a nupui Sky Sports presenter Charlotte Coleman pawh a thlenna hotel-ah a thleng ve thei dawn lo tihna a ni.

Kum 1958 World Cup an khelh hnua an tournament liantham khelh lehna hmasa ber khel tura Wales kaihruaitu Coleman chuan, "Group stage kan khelh chhungin kan bialnute emaw, nupui leh chhungte tumah kan hotel-ah an awm ve kan phal lo ang," a ti.

Welsh manager chuan sawi chhun-zawmin, "Ni 10 chhungin match thum khelh tur kan nei dawn a, chhungkuaa hun hman nan hun a awm lo," tiin inkhelah chauh an rilru an pek tur thu a sawi.

Coleman chuan sawi chhunzawmin, "He hun ropui tawng tur hian kan nghak rei thawkhat tawh a, Wales tan inchhuanna tham hna thawk turin kan inbuatsaih mek a, hei hi chu inhlanna chhete chauh a ni," tiin tih mai mai an tum lo hle.

Wales hian Ningani zanah Northern Ireland chu friendly match khelhpui turin an mikhual dawn a, March 28-ah Ukraine chu khualmualah an lenchilh thung ang.