Vawiin aṭangin MBBA Cup

Mizoram Basketball Association hnuaia inelna ngaihhlut MBBA Cup chu vawiin aṭangin Hawla Indoor Stadium-ah khelh ṭan a ni dawn a, inelnaah hian mipa leh hmeichhe inelna a awm ang. Mipa inelnaah hian MSL team pariat leh D League club pariat te an tel dawn.

MSL club hi group pahnihah ṭhendarh an ni a; pool A-ah Khatla TBL, Bungkawn LB, Champhai leh Venghlui VR4 te an awm. Pool B-ah Zarkawt BCA, Mission Veng Hotshots, Chanmari Vikings leh Nursery SC te an awm thung. D League club-te pawh hi group pahnihah tho sem darh an ni. Pool C-ah Zemabawk BC, Khatla South Barons, RSC Basketball Club leh Tuikual South BC te an awm a, pool D-ah Saron Veng BC, EBBC, Chawnpui BC leh OPD Venghlui BC te an awm thung ang.

League round hi chu knockout stage-a an awmna tur zawnna ringawt a ni a, chumi awmzia chu team 16 hian knockout stage an lut vek dawn. Chutihrualin sang tak thleng tur chuan fixture ṭha a pawimawh a, khingpui nem zawk an neih theih nan league round-a chet ṭhat a pawimawh ang.

Hmeichhe inelnaah hian team panga Team Alpha, Bungkawn LB Associates, Zonuam House of A&S, Durtlang Mohicans leh Bungkawn Vengthar SC te an awm a, vawi khat ṭheuh an inkhelh kual hnuah a sang pahnihin November 28, Thawhlehniah final an khel ang.