Tata SK 612 LPS Pro Fight a ṭiak ta

Tualchhung boxing inelna lian leh ngihhlut Tata SK 612 LPS Pro Fight chu Inrinni zan khan khelh zawh a ni a, kumin Pro Fight-ah hian title fight pariat awmin Zirtawpni zan khan inhnek pali a lo awm tawh bawk a ni.

LPS Arena, Folkland Vengah hian Pro Fight 2023 bikah boxer 281 inlanin inhnek vawi 276 a awm. WBC India huangah boxer paruk telin inhnek vawi thum a awm thung.

Welterweight: Lalruatzela Hauzel

Lalruatzela Hauzel (Mission Veng) bt Vanlalruatpuia (Saikhamakawn)

Unanimous Decision (39-37, 39-37, 40-36)

Kum 22 mi chauh la ni mah se Lalruatzela Hauzel a fimkhur thiam hle a, mahni inveng chunga hnek chhuak tam zawk a nihna a hlawkpui. A chung leh hnuai zawngin a hnek tam a, round hnuhnung berah vawi thum hnek fuh zawnin a che ṭha.

A khingpui Ruatpuia'n a kut vei lam ni dang angin a hmang ṭha tawk lo deuh, vai na viau ṭhin mah se a hneh fuh tam tawk lo. Hnehna changtu Ruatzela'n a champion avangin lawmthu sawi tur pawh a haihchham hial a, a lawmna erawh mipuiin an hmu thiam. Pro Fight champion a nih rualin professional a khelh vawi thumna a ni a, a ṭum khat nan a chak.

Lightweight: HC Lalramfela

HC Lalramfela (Chawngtlai) bt C Lalhruaitluanga (Cherhlun)

Split Decision (37-38, 39-37, 39-37)

HC Lalramfela hi Pro Fight hmasa khan title fight-ah a chak lo, kumin erawh a hun a her chhuak ve ta. Kum 2015 khan Ramfela hi bantamweight champion a lo ni tawh, kum riat a ral hnuah title a hnek chhuak leh ta chiah a ni. Round hnihna thlengin Ramfela'n nawr zawkin a khel ṭha viau. Cherhlun tlangvalin round thumnaah a khelh dan tidanglamin a nawr let a, a hma aiin a kang hret.

Round hnuhnung berah Ramfela a hnungtawlh hman, a mitko kak bawihsawm a nih hnuah bei letin vawi thum chiang takin a vai fuh zawn a - Hruaia a tlu. Referee-in chhiar a tum laiin lawm avanga a zuanna lamah a tlu a, an tluk ve ve avangin referee-in a chhiar loh phah. Hemi hnu hian nhnek zui lehin Ramfela a chungnung ta zawk a ni.

WBC India Super Lightweight Championship: Vanlalawmpuia

Vanlalawmpuia (Khuangthing) bt Gugan Kumar (Chennai)

Technical Knockout (Round 2, 2:49 min)

Vanlalawmpuia'n LPS Pro Fight title kalsawnin WBC India super light title a chuh a, round hnihnaah technical knockout-in Chennai boxer Gugan Kumar-a a hneh. Khuangthing fighter hian a tir aṭangin hnek tluk a tum nghal a, feet 6-a sang Gugan invengin a tawlh kual a, a ban phak aṭangin a hnek let. Round hnihnaah a huai zawk Awpa'n a ding lamin a hnek tlu a, a thawh leh hnuah umin a ding lamin a vai tlu leh a, second 11 a la awm tihin referee Ajay Salvi chuan a titawp - awlsam takin Awpa a chak. Professional huanga vawi sarih a chakna niin knockout hmanga hnehna a chan ṭum ngana a ni.

Flyweight:  NT Lalbiakkima

NT Lalbiakkima (Siaha) bt Vanlalenkawltira (Champhai Dinthar)

Split Decision (39-37, 39-37, 37-39)

NT Lalbiakkima'n sulhnu nei ṭha viau mah se Vanlalenkawltira laka flyweight title la turin vanneihna a mamawh tel. Siaha fighter hian rahbi thar a tuk - HC Johnkenty Vanhlimpuia nen Pro Fight champion vawi nga ni tawh record inṭawm an neih chu a kalsan a, a vawi ruk nana champion thei hmasa ber a ni.

Tualchhung boxing inelna lianah hian bitum zawng zawng a la hneh vek. Nt-a hian kum 20 mi Enkawla lakah erawh inhneh thunun a harsat a, mipui lam pawhin chak zawk tur rin thiam harsa an ti hle. A vanduai zawkah ṭang rih mah se Enkawla'n chawlh mai a la tum lo a, kum dangah ṭha zawka inlan a tum - Pro Fight inhnek hmuhnawm bik min la chhawpchhuahsak leh ngeiin a rinawm.

Middleweight: C. Lalhruaitluanga

C. Lalhruaitluanga (Chawngtlai) bt

F Lalthanliana Junior (Lunglei Electric Veng)

Unanimous Decision (40-36, 40-36, 40-36)

Kum 2022 khan C. Lalhruaitluanga hi welter champion a lo ni tawh, kum 25 mi Hruaia'n a vawi hnih nan kuminah title a hnek chhuak leh ta chiah a ni. Professional boxing ṭum sarih a khelhna niin a chak vek, sulhnu a nei ṭha hle. Chak lo zawk Thanliana pawhin inelna a hmang ṭha viau, chutihrualin Pro Fight a tel hmasa berna a nih avangin hun pawimawhah boruak a la ngam lo zawk deuh hret tih a lang - hmabak êng tak a nei tih erawh a takin kan hmu.

Super Bantamweight (WBC India Ttile): F. Zoramchhana

F. Zoramchhana (Cherhlun) bt Adil Rajesh Kumar Singh (Mumbai)

Unanimous Decision (80-72, 80-72, 80-72)

F. Zoramchhana'n a phu ang ngeiin hnehna a chang a, lawm avangin a mittui a dang zo lo - hnukulh chunga WBC India super bantamweight champion kawnghren a hren chuan thlirtute rilru a hneh hle. Zotea hi Pro Fight title fight-ah 2017-2022 chhungin vawi thum a tlawm zawn a, WBA Asia title chuh tawhin a chak zo lo bawk. Title Fight-a ṭum nga a inlannaah hlawhtlinna a sual chhuak a, beidawng duh loa a beih rah a takin a tawng ta a ni.

Bantamweight (WBC India Title): Laldingliana

Laldingliana (Tuipui) bt Pradish A (Chennai)

Technical Knockout (Round 1, 2:53 min)

Laldingliana'n a khingpui Pradish A chu vawi hnih a hnek tlu a, Chennai boxer hi rawn tho chhuak leh mah se Dinga'n vawi sarih ngawt a zawnin a hnek fuh a, referee Ajay Salvi chuan round khat a zawh hma lawkin inhnek a ti tawp. Tuipui tlangval hian November 26, Pathianniah WBC Asia title chuh a tum a, tun ṭum inhnehk hi a tan inbuatsaihna ṭha tak a ni nghal ang. Professional a luhchilh aṭangin boxrec-a a inhnek chhinchhiah tawh vawi liah a chak vek a, knockout-a a chak vawi thumna a ni.

Bantamweight: Laldinsanga

Laldinsanga (Lunglei Ramthar) bt Ramdinthara (Pangzawl)

Unanimous Decision (38-37, 39-36, 40-35)

Laldinsanga chan Pro Fight weight hrang pahniha a champion-na ni turin Ramdinthara a hneh. Nikumah a tumpui apiang knockout vekin flyweight title a la a, kuminah erawh a tan inelna a hautak ta hret. Ramdina'n round khatnaah na taka nawrin chiang tak takin a hnek a, round hnihna aṭangin Dinsanga rawn kang hretin round lina tawp nan second 27 a la awm tihah ama thuin Ramdina a chawl ringawt, referee Malsawmsanga'n chhiarin point paihsak a nih phah a, tawn hriat a neih tlem a tuar.