Mizo tleirawl hockey khel thiam an chak

Khelo India Youth Games 2020 neih laiah nimin khan Mizoram hmeichhe hockey team chuan an match hmasa ber khelin Odisha chu 2-1 in an hneh. Vawiin chawhnu dar 1:30 hian Haryana an hmachhawn leh ang.

Guwahati, Assam-a inelna neihah Mizoram lamin goal an phur hmasa. Odisha tan Rinki Kujur chuan minute 20-naah goal hmahruai a rawn khung. Mizoram lam an beidawng duh lo; Thenzawl Hockey Training Center aṭanga inzir chhuak F. Lalawmpuii (41') chuan si phurh a sut.

Hun tawp hma minute thum chauh a awm tawh tihah National Hockey Academy, Delhi-a inzir lai forward Awmpuii hian chakna goal a khung leh bawk. Coach B. Lalroṭhuami kaihhruai Mizoram tan hian India international Lalrindiki leh Marina Lalramnghaki te an inlan bawk.

Hockey inelnaah hian team ṭha zual pariat chiah an inlan. Mizoram hi Junior National Championship-ah pathumna an nih vanga inlan thei an ni. Pool B-ah Haryana, Odisha leh Chandigarh te nen an awm khawm - an inkhel kual hnuah a sang pahnihin semifinal an lut ang.

Nimin khan Mizoram mipa football team pawh an inlan a, mahse an vanduai. Inelna thlengtu Assam lakah Mizoram hi 3-2 in an chak lo.



Share this Post

Login to comment
No Comments