Gal Gadot-i'n Hamas pawikhawihna film screening buatsaih

Hollywood actor, Wonder Woman Gal Gadot chuan Ningani zan khan Los Angeles-ah Museum of Tolerance-ah Hamas firfiakte'n Israel an beihna video, edit lohte screening-na hun a buatsaih. Screening neih lai hian pawn lamah Palestinian thlawptu lamin buaina an lo siam nia sawi a ni.

Gal Gadot hi Israel-ah a awm mek avangin screening neihna hmunah a tel lo a, mahse, sawm bik mi 200 vel chu venhimna khauh tak hnuaiah an tel. An zingah hian Israel Defence Forces (IDF) official, UN-a Israel ambassador bakah Hollywood executive-te pawh an tel. He hunah hian October 7-a Hamas-te'n Israel an beih lai, rawng taka civil mi an beihna footage rapthlak tak takte tihchhuah a ni. Footage ṭhenkhat hi anmahni Hamas mi leh sa ngeite'n an lakte niin an sawi. He film hi 'Bearing Witness' tih niin minute 43-a rei a ni. Gal Gadot hi lemchan lam a luhchilh hmain IDF-ah hian a lo ṭang tawh a ni.

Hamas-te'n Israel bei a, rawng taka mi tam tak an that leh, mi eng emaw zat an man chungchangah Hamas firfiakte leh an chet dan demna thu hi Gadot hian a lo sawi tawh a, hetih lai hian Palestinian mite tawrhna lampang a sawi ve lo tiin ṭhenkhat chuan an dem let ve thung.