Barcelona chuan Thawhṭanni zan khan coach  Ernesto Valverde an ban thu an puang a, a aiawh tur hian Real Betis boss hlui Quique Setien an lalut nghal.

Kum 55 mi Valverde hian Barcelona hi season hnih chhung chu a zawnin La Liga nomawi a chawipui tawh a, tun season-ah Real Madrid aia goal difference-a ṭha zawkin hma an hruai mek bawk. 

Mahse, he result hi Barca coach ni tura pressure sanzia pholanna mai a ni a, Catalan club-in Pep Guardiola hnuaia game mawi tak an hmuh ṭhin kha an hmuh loh avangin Valverde an ban. 

Barcelona chuan, "Professional taka thil a kalpuina te, he club tana a inpekna leh theihtawp a chhuahna zawng zawngah lawmthu kan sawi a ni," tiin an coach hi an thlah. 

Mangṭha Valverde

Valverde hian kum 2017 khan Athletic Bilbao chhuahsanin Barcelona a zawm a, player a nih lai pawha a lo khelh tawhna club tan hian La Liga (2), Copa del Rey (1) leh Spanish Super Cup (1) nomawi a chawi hman. 

Mahse Olympiakos-a enkawl lai pawha league nomawi pathum lo chawi tawh coach hi Champions League-a AS Roma leh Liverpool a hmachhawn ṭumin a mualpho a, season hnih chhungin semifinal a paltlang lo. 

Tun season La Liga-ah hma hruai mah se an elpui team chetchhiat zara hmahruaitu tia sawi theih an ni a, khualmualah Athletic Bilbao, Granada leh Levante ngam loin Osasuna, Real Sociedad leh Espanyol chu an draw thei hram bawk. 

Khualmualah Barcelona-in beisei an phak lo ṭhin hi club thuneitu lam mit ti khamtu a tling a, a tawpah chuan coach-in a tuar ta. 

Hello Setien

Barcelona hian Valverde an ban hma hian an club legend Xavi chu coach ni turin inbiakna an neihpui a, Qatar club Al Sadd boss hian Barca sporting director Eric Abidal leh chief executive Oscar Grau a hmuh thu sawi mah se  Barca coach ni turin a la hma hretah a ngai a, a hnar. 

Catalan club-in coach thar neih vat an duh avangin Quique Setien lam an hawi a, player a nih laia Atletico Madrid tan pawha lo khel tawh coach hi kum hnih leh a chanve chhung atan contract an ziahpui. 

Kum 61 mi coach hian tawnhriat nei ṭha mah se club langsar a enkawl ngai loh avangin Europe-ah coach langsar a ni phak lo. Spanish football division hniam lama club a enkawl hnuin 2015 khan Las Palmas a enkawl ṭan. 

Las Palmas a zawm hian relegation zone-ah an awm a, season a tawp meuh chuan kum 40 chhunga La Liga-a an thlen san ber tawnpuiin 11-na a nihpui. Betis chu May 2017 - May 2019 inkar kha a enkawl a, a season khatnaah parukna nihpuiin Europa League an khel. 

Barca 'football'

Las Palmas boss hlui Setien hi coach luhlul leh mahni thu duh ve tak a ni a, Spanish football-ah chuan hei hi a larpui hle - club board lamin thuneihna sang tak an neihna hmun Barca-a a chet dan tur hi hmuh châkawm a ni. 

Setien hi Barcelona legend Johan Cruyff-a football kalphung 'Cruyffian football' ngainatu a ni a, Barca fan-ten an kalphung passing hmuhnawm, game rang leh attacking na tak an hmu leh thei dawn. 

Chutihruala hriat tel tur chu Lionel Messi hi player thiam chungchuang ni reng mah se a kum a tam ve ṭan a, an player pawimawh dang Sergio Busquets, Gerard Pique leh Jordi Alba te an upa tawh bawk. 

Cruyffian football-in a ken tel 'nung' taka khelh hi heng player rual hian an la tlin kher ang em tih chu zawhna awm thei a ni a, Valverde game kha an tlin tawk a lo ni reng mai thei - hunin min la hriattir thuai ang. 

Share this Post