KHAWTHLIR

Thisen pe

District Institute of Education and Training (DIET), Aizawl NSS chuan DIET Aizawl kum 70 tlinna, platinum jubilee pualin nimin khan Aizawl Civil Hospital tan thisen unit 73 an pe a, petute mipa 42 leh hmeichhia 31 an ni. Salvation Army Youth, Serchhip Corps-te'n Serchhip District Hospital tan unit 13 an pe bawk a, petute mipa pakua leh hmeichhia pali an ni.

Inthlan thlir lêt

November 9, Ningani khan Lunglei district election officer Ramdinliani hoin a pisaah November 7, 2023-a MLA inthlan neih zawh tâk returning officer, assistant returning officer leh nodal officer-te'n an thlir lêt. Official-te'n an mawhphurhna chanvo ṭheuha hma an lak dan te, hmasawn a ngaihna laite leh tih chhunzawm atana ṭha tura an hriatte tarlan a ni. Lunglei district mipui te, candidate leh party worker-ten Election Commission of India (ECI) in tihtur a tih leh tih loh tur a tihte an zawm ṭhat thu leh Model Code of Conduct bawhchhiatna lian tham a awm lo thu pawh tarlan a ni.

Heroin man

Phaisen Police Outpost-a duty-te chuan November 10, Ningani zan khan Assam lam pana tlân lirthei pakhat aṭangin heroin kg. 1.437 leh a neitua puh hnam dang pakhat an man. Heroin neitua puh Jiya-ul Islam Bharbhuyia (32), Hailakandi district, Assam lakah Vairengte Police Station-ah thubuai ziah luh a ni a, nimin khan Kolasib District Court-a hruai a nih hnuah jail-ah dah a ni.

Fin Khawm

Mizo Academy of Letters, Joint Headquarters, Lunglei golden jubilee souvenir, 'Fin Khawm' tih chu nimin khan Lunglei Municipal Council chairman Lalzuithanga Khiangte-in Lunglei DRO pisa hulhliapah a tlangzarh. Fin Khawm hi thu hrang hrang lâk khawm niin, thupui hlawm 27 a awm a; thuchham, lengzem, autobiography, ṭawng upa hman dan, award hrang hrangte leh Mizo tlawmngaihnate a tel.