Bank of India branch thar hawng

Bank of India-in Mizorama an branch pathumna - Aizawl Branch, Bawngkawna mi chu nimin khan Bank of India general manager NBG (East) Manoj Kumar Singh-a'n a hawng.

Manoj Kumar Singh chuan, Bank of India-in Mizo mipui tan theihtawp chhuah an inhuam thu sawiin, "Mizorama thawktute pawh tualchhung mi vek an ni a, Mizo mipui tan dàwr a awlsam tawh. Mizoramah branch tam zawk kan hawng dawn," a ti a; Bank of India chu nationalised bank a nih angin mipui huap zo tak leh mi tin ban phâk bank a nih thu a sawi.

Bank of India hi September 7, 1906-ah hawn ṭan a ni a, kum 1969-ah nationalised bank-ah hlan kai a ni. Tunah hian branch 5,000 chuang nei mekin, khawmualpui (continent) pangaah branch leh representative office an nei.

Mizoramah kum 2011 aṭangin an rawn inbun a, tunah hian Zarkawt leh Venghlui (Pi Pangi peng)-ah branch an nei mek a, nimina an hawn tâk hi an branch pathumna a ni.