Inthlan result hriat la ni lo mah se, kan sorkar ngei kan inring - Lalliansawta

ZPM party chuan nimin khan Aizawla an pisaah lawmthu sawina inkhawm an hmang a, an president Lalliansawta chuan, inthlan result hriat la ni lo mah se, an sorkar ngei an inrin thu a sawi.

Lalliansawta chuan, "Inthlan result puan la ni lo mah se sorkar ngei kan inring a, hetiang dinhmun min hruai thlengtu Pathian hnenah lawmthu awm se la. Pathianin min hruai tlat avang hian lungrual takin kan kal zel dawn a ni," a ti.

ZPM-in inthlanpui vawi hnih an hmachhawn tawh tih sawiin Lalliansawta chuan, "A party zawng chuan naupang hle mai ila, tunah chuan sorkarna chan kan beisei ta," a ti a; ZPM chu party/pawl hrang hrang awm khawm, politics-a la inhmang ngai rêng rêng lote leh tawnhriat tam tak lo nei tawhte kal khawm ni mah se, buaina nei loa an kal dan chu a fuh hlea a hriat thu a sawi.

ZPM President chuan, an kawng Pathianin a hruai nasat thu leh Pathianin a kawhhmuhna kawng an zawh chu a fuh thu sawiin, "Tlang hrang hrangah candidate-te ei hêk loa a petu zawka kan ṭangte hi a lawmawm em em. Party leader ṭha tak Pathianin min pe bawk a, pa-in a fate a enkawl ang deuh hian ka hmu a, a thawk rim em em a, pa nih a tlin tak zet a, kan vannei em em a ni," a ti.

ZPM vice president Dr Kenneth Chawngliana chuan, inthlanah pawisa pawimawh hle mah se, sum an nei lo a, party dangte MLA pakhat senso zat pawh ZPM candidate zawng zawngin an hmang tling lo hial niin a sawi.

Kenneth Chawngliana chuan, vai rama company lian tam takin ZPM chu sum an tumsak theih thu an hrilh ṭhin thu sawiin, "Min finance theih thute an rawn sawi a, min sáwm nasa em em. Mahse, kan hotute'n a hnu leh beiseia hetiang rawn kalte hi rethei hle mah ila hnâwl ngam ang u, an tih avangin kan hnâwl vek a ni. Khatiang tel loa kan kal thei hi a lawmawm em em a, tuna a lan dan chuan ZPM hian mahniin sorkarna kan siam dawn a ni," a ti.