Australian Open boruak a chiri

Ram kang vangin Australia ram a buai mek a, boruak a thianghlim tawk loh avangin January 20 aṭanga khelh ṭan tur Australian Open pawh season dang angin a boruak a 'hot' tak tak thei rih lo - meikhu zam vel karah player leh inelna buatsaihtu lam chu rilru chiri takin an awm mek.

Tun kar aṭang hian Australian Open hi qualifier khelh ṭan a ni, nimin khan Melbourne khawpuiah meikhu vanga boruak a thianghlim tawk loh avangin inkhelh hun sawn tlai a ngai hial. Player dangte pawh inbuatsaihna hun an hman tur chu ṭhulhtir rih an ni.

Ram kang chu

Kum dangah pawh Australia ramah hian nipui lai chuan kangmei a chhuak fo a, kumin erawh a kang nasa zual hle. BBC-in a tarlan dan chuan nikum July thlatir lam aṭang khan kangmei hi a chhuak ṭan niin an sawi a, khawvel hriata a kan chhuah tak erawh September thla kha a ni thung.

Nipui boruak lum lai a ni a, khua a ro bawk. Kangmei hi December thla aṭang khan a zual kai nasa hle - nimina media lam tarlan dan chuan hectare maktaduai 10 (100,000 sq km) vel a kang tawh. A la kan belh mek zel a, a zau tual tual rih ang.

Mihring thi zat hi hriat chian chinah 28 an tling tawh, chenna in chhe zat pawh 2,000 zet niin; ramsa leh nungchang kang hlum zat hi hriat chian theih ni lo mah se tluklehdingawn chuang zet an thi tawha chhut a ni! Australia mai ni loin khawvel tan chhiatna rapthlak a tling.

A nghawng na

Ram kangin meikhu tam tak a siam chhuak a, mithiam ten heti tak maia a kan nasat chhan hi boruak inthlak, a bik takin khaw lum chho zel vang niin an sawi. National Aeronautics and Space Administration (NASA) chuan, "Boruak chhia hi van sangah a awm tawh chuan hmun hla takah a darh thei.

"Ram kanna hnaivai mai ni loin khawvel pum tan boruak ṭha lo a thlen thei," tiin an tarlang. Nimin, Thawhlehni zinga Air Quality Index tehna aṭang chuan boruak bawlhhawlh zawng hi 229 a tling a; hei hi 'Hrisel nana ṭha lo tak' tia tarlan a ni hial.

Nimin zing khan ruahman dan chuan dar 5:30 aṭangin Australian Open qualifying hi khelh tur a ni a, mahse boruak a bawlhhlawh em avang hian a hunah an ṭan thei lo - chhunah kha chuan player ṭhenkhat chuan an match hmasa ber an khel thei ṭan chauh.

Beisei ang ni lo

Kar hmasa mai khan tournament director Craig Tiley chuan, "Khawthlirna aṭanga a lan dan chuan boruak hi a ṭha zel dawn a, tournament pawh a hun tih danglam ngai loin a dan pangngaiin tluang taka neih theih beisei a ni," tiin a sawi tawh.

Mahse, beisei angin thil a thleng ta lo. Inelna buatsaihtu lam chuan nimin khan Twitter lamah an dinhmun tarlangin, "Player, staff leh fans lamin hrilselna ṭha an neih chu kan ngaih pawimawh hmasa ber a ni. Hetiang lama mi thiamte nen ngun takin kan inbe reng a, a him chinah chauh thil kan kalpui ang," an ti.

Nimin chawhnu lama match an khelhtir ngam tawh avangin boruak chuan ziaawm lam a pana ngaih a ni a, chutihrualin duhthusam erawh a la ni lo ang. Kum dangah pawh khaw lum vanga match khelh laklawh laia chawlh (break) an neih tawhna ṭhin tournament a nih miau avangin kuminah hian ngaihtuah a ti thui hle.

Ṭanpuina

Thawhṭanni khan International Tennis Federation bakah Wimbledon, US leh French Open te chuan kangmei tuarte tan hian pawisa an thawh, an pawisa thawh khawm hi £308,000 (Rs nuai 2,83) zet a ni. ATP pawhin £383,000 (Rs nuai 3,52) an pek thu an lo puang tawh a ni.

Tennis season hi Australia aṭanga ṭan a ni ṭhin, tunah pawh he hmunah hian inelna neih mek a ni. Player tam takin an sum hmuh chhuah leh hlawkna an neih aṭang tein ṭanpuina an sem chhuak tawh. Serena Williams leh tualchhung nula Ashleigh Barty te pawhin inelna an hmachhawn hnuhnuna an lawmman dawn an pe vek.

Australian Open neih hmain, vawiin hian Melbourne-ah player langsar Rafael Nadal, Roger Federer leh Serena te bakah tualchhung player Nick Kyrgios te chuan ṭanpuia sum tuak nan Rally4Relief exhibition an khel dawn, an sum hmuhchhuah hi kangmei tuarte ṭanpui nana hman tur a ni ang.



Share this Post

Login to comment
No Comments