Chak zawkin ram hi kan kaihruai leh ngei ang - Zoramthanga

MNF president Zoramthanga chuan nimina Mizo Hnam Runa inkhawmah thu sawiin, "Pathian leh mipui zarah kan sorkar leh ngei ang a, chak zawkin ram hi kan kaihruai leh ngei ang," a ti.

Zoramthanga chuan, MLA inthlanpui tluang tak leh harsatna lian tham awm loa neih a ni chu lawmawm a tih thu sawiin, "MNF chu Pathian remruat ang zelin kan kal a, kawng engkimah Pathianin ṭha a tih ang zelin hun min ruatsak zel a, a remruatna tu'ma dâl theih a ni lo," a ti a; MNF candidate-te an tlin theihna tura theihtawp chhuahtute chungah a lawm thu a sawi.

MNF President chuan, an sorkar chhungin Covid-19, lirnghing, ramri buai, rambuai, thil dangte'n a chîm buai tih sawiin, "Kan tan Pathianin rem min ruatsak angin MNF party chu mipui tan ding kan nihna angin mipui tana harsatna awm lo thei tur ang berin kan kal a, Pathianin tun hun hi min hruai thleng a ni," a ti.