Mizo ṭhalaite'n an hnathawhna hmunah fak an hlawh - Governor

Mission Foundation Movement (MFM) chuan nimin khan Durtlanga an hmunah geriatric caregivers zir chhuakte thlahna hun an hmang a; an hun hmanpuitu Governor Dr Hari Babu Kambhampati chuan, Mizo ṭhalaite'n state páwna hna an thawhnaah fak an hlawh thu a sawi.

Governor chuan, Mizo ṭhalaite zingah nurse leh healthcare professional hna thawka hmun hrang hranga awm an pung zel tih sawiin, "Mizo ṭhalaite hian an hnathawhna hmunah fak an hlawh hle. Tunah hian India ram páwnah leh ram chhungah Mizo ṭhalaite tan healthcare sector-ah hlawh ṭha tak neiin hnathawh tur tam tak a awm a ni," a ti.

Sorkar hna a tlem thu sawiin Larsap chuan, "Mi zawng zawng tan sorkarah hna thawh tur a awm tam tâwk lo," a ti a, state páwna healthcare sector-a hna thawk theih tura inzir a pawimawh thu a sawi.

Dr Hari Babu Kambhampati chuan, ram changkang tam zawkah kum upa lam an tam zel avangin kum upate enkawlna lamah thawh tur a pung chak hle tih a sawi a, "India hmarchhak ṭhalaite leh a bikin Mizo ṭhalai, hawihháwm leh themthiam tak takte'na an thiam sa leh tlem zir hnua awlsam taka an thawh theih a ni. Japan, Malaysia, Singapore leh hmun dangahte pawh he hna hi mamawhna a sang tawh hle," a ti.

Governor hian geriatric caregivers zir chhuak mi 25 hnenah certifcate a hlan a; MFM director R Vanlalzauva pawhin thu a sawi a ni.