ZMC faculty-te'n inkhawmpui an hmang

Zoram Medical College Faculty Doctors Association (ZFDA) chuan nimin khan ZMC Academic Block-ah Annual Conference vawi khatna an hmang a, Mizoram Universty vice chancellor Prof. Dibakar Chandra Deka-a'n a hmanpui.

Inkhawmpuiah hian ZMC din theih nan leh hmasawn nana thawh hlâwkte chawimawina hlan a ni a, ZMC director hlui Prof. L Fimate, director Dr John Zohmingthanga leh registrar Dr Jane R Ralte te hnenah chawimawina hlan a ni.

MZU vice chancellor Prof. Dibakar Chandra Deka chuan, ZMC chu Mizoram University hnuaia affiliated college a ni chu lawmawm a tih thu a sawi a, "Ram hmasawn nan discipline hrang hrang thawhhona a pawimawh a, Mizoramin hriselna lama hma a sawn zel theih nan leh MBBS zirlaite chu doctor ṭha tak an nih theih nan theihtawp chhuah zel ang che u," a ti.

Conference-ah hian chawhmaah thupui hrang hrang zirho a ni a, chawhnu lamah rorel inkhawm leh kum 2023-2025 chhunga an hruaitu tur thlan a ni.

Kum 2023-2025 chhunga ZFDA office bearer turin Dr Lalrinfela, Dr Benjamin Lalrinpuia, Dr C Vankhuma, Dr Samuel Lalhruaizela, Dr Zothansangi leh Dr Betty Laldintluangi te thlan an ni.