Oleksandr Usyk vs Tyson Fury: Usyk-a'n February-ah an inhnek theih a beisei

Heavyweight boxer rothap Oleksandr Usyk chuan Tyson Fury nena an inhnek tur chu February-ah a thlen hman a beisei thu a sawi a, heavyweight world title fight hi Saudi Arabia-in a thleng tura ngaih a ni.

Boxer pahnih hi ruahmanna hmasaah chuan December 23-ah inhnek tura tih an ni a, mahse, kar hmasa lawk khan promoter Frank Warren chuan boxer pahnih an intawn a beiseiawm loh thu a sawi chhuak.

Hei vang hian kumina boxer pahnih intawng tura ruahmanna awm tawh chu a thleng lo tura ngaih a ni a, mi tam tak chuan an intawn loh hlen an hlau hial - mahse, Usyk a ṭawng chhuak a, nakkum kumtir lamah tal boxer pahnih kan hmuh a rinawm.

Buaina chu

October thla tawp lam khan Fury hian UFC heavyweight champion Francis Ngannou a hmachhawn a, Ngannou hi boxing khawvela tawnhriat nei lo a nih avangin Fury tan hna harsa a awm lo tura ngaih a ni.

Mahse, Fury hi sawisel theih takin, split decision hmanga chak zawkah puan a ni a, Usyk meuh hmachhawn turin tun hnaia a boruak hi a ṭha tawk em aw, tih theih hial a ni.

Hetiang boruak karah hian Fury promoter Warren ṭawng chhuakin, "Khatiang ang inhnek hautak lutuk a hmachhawn hnu lawka ring luh leh chu Tyson tan a harsa tawh. Kar riat bak hun a awm tawh lo - Fury hian inenkawl dam a, a taksate a duat leh phawt a ngai," a ti a, thla thar tirah camp an neih ṭan leh tur thu a sawi bawk.

Usyk a beiseina

Fury chawl rih dawn mah se Usyk a beidawng lo a, inhnek theih ngei a beisei. Kum 36 mi boxer chuan, "December 23-a inhnek turin ka lo inpeih a, mahse, Fury-a'n hliam a neih avangin nakkumah kan inhnek ngei ka ring," a ti.

Usyk chuan sawi zawmin, "Tehcnical work ti turin hun tam zawk ka nei tihna a ni a, engmah a danglam phah lo e. Thil ṭhenkhat atan inbuatsaihna hun ṭha ka nei a ni mai - Fury lam ka ngaihtuah lo, keimah, ka team leh chhungkua chiah ka ngaihtuah.

"Ka khingpui tur chungchang ka ngaihven a ṭul lo. Amah ka hmachhawn theih hi a tawk mai - ka hlawhtinna, hnehna ka chan te leh ka thawhrimna zawng zawng hi kan chhungkua leh ram tan a ni," a ti.

Fury dinhmun

British boxer hi hliam na tak chu a ni hranin a lang lo. Mahse, a beisei aiin Ngannou tukdawl kha a lo awlsam lo ni berin a lang a, Fury-a'n a rin aia tam tha a sen avangin Usyk meuh hmachhawn tura inbuatsaih lehnghal a tan a harsa.

Kum 35 mi Fury hi round thumnaah Ngannou hian a hnek tlu hial a, heavyweight boxing-a boxer ṭha ber pawla ngaih Fury tan mualphona a ni - he inhnek hi Usyk pawhin a hmunah a en a, inhnek zawhah Fury nen ring chhungah an incho fiam hial.

Thil thlen dan uluk taka thlirin Fury tan inhnek hun sawn hret hi thutlukna fing a ni, tih loh rual a ni lo a, vawi 35 fight a hmachhawn tawha la tlawm lo boxer tan uluk zawka inbuatsaih a ṭul.

Inbiakna chu

Fury hian WBC heavyweight title a kawl mek a, WBA, WBO leh IBF champion Usyk nena an inhnek hi khawvelin a nghakhlel - a chak zawk chuan heavyweight boxing-a kawnghren lian tham pali chu an kawl vek dawn tihna a ni a, a ropui dawn.

Boxer pahnih boruak hi a len em avangin inbiakna pawh rei tak kalpui a ni a, September thla khan an intawn theih ngeina turin inremna siam a ni - khawvelin nghakhlel viau mah se Fury-a dinhmun avangin sawn a ṭul leh ta si.

Boxing legend Lennox Lewis chuan kum 1999 khan WBC, WBA leh IBF heavyweight title a kawl a, khatihlai khan major title pathum chiah a awm lai a ni - tunah pali a awm a, Lennox Lewis hnua kawnghren kawl kim vek nih tuma Fury leh Usyk intawn hun khawvelin a thlir mek e.