Khelo India Youth Games 2020 neih mekah Mizo Table Tennis khel thiam pahnih Jeho Himnakulhpuingheta leh Alberto LR Ruata te chuan doubles huangah gold medal an vaw chhuak; tun inelna bikah Mizoram tana gold medal la hmasa ber an ni. Jeho-a hian singles huangah bronze medal a la bawk.

Guwahati, Assam-a inelna neihah Mizo rawlthar pahnih hian Pathiannia final inkhelah Delhi aiawha inlan Payas Jain leh Yashansh Malik te ṭangdun chu 11-8, 11-7, 11-8 (3-0) a hnehin an champion. Table Tennis huangah hian India rama a ṭha zual 16 chauh an inel a, tel phak nih ringawt pawh a awlsam lo takzet. 

Jeho leh Alberto hian an match hmasa berah Delhi mi tho Aadarsh Chhetri leh Arush Dutt te chu 3-0 in an hneh a, semifinal-ah Tamil Nadu aiawh Suresh Raj Preyesh leh Vishwa Deenadayalan te lakah game hloh loin hnehna an chang bawk.

Mizoram team hi manager Zarema Pachuau leh coach Lalsangliana Hmar te chuan an hruai. Zorema chuan, "Kan tum leh beisei angin doubles huangah chuan kan khel chhuak thei," tiin hlawhtlinna an chan dan Vanglaini a hrilh.

Kum 17 hnuai lam mipa table tennis inelnaah hian India cadet leh sub junior number 1 pawh ni tawh Jeho-a chuan singles huangah semifinal a thleng bawk a, nimin tlai khan Delhi rawlthar Aadarsh Chhetri lakah 4-2 in a vanduai.

Singles match chungchanga Vanglaini zawhna chhangin Mizoram manager Zorema chuan, "Vanduai vang chauh a ni, Jeho-a'n fal taka hma a hruai tawhna game ṭhenkhatah Aadarsh Chhetri khan vanneih vang liau liauin point a hmu hlauh ṭhin.

"Gold medal dang beisei mah ila kan duh ang chu kan thleng zo lo, chutih rualin theihtawp kan chhuah a, kan medal lakah hian kan lawm. Min ṭawngṭai puitute vanga hlawhtlinna chang thei kan ni," tiin a sawi.

Share this Post