Indo-Naga inremna phutin kawng zawh

Manipur-a Naga awmte chuan India leh Naga inkara inremna a awm thuai theih nan Ukhrul district headquarter-ah kawngzawhin, kawngzawhnaah hian mi sang chuang an kal khawm a ni. Kawngzawh hi Manipur-a Tangkhul-a Naga hnam zirlai pawl pakhat, Tangkhul Katamnao Saklong (TKS) buatsaih niin, Tangkhul te hi Manipur-a Naga hnam awm zinga a lian berte an ni.

Kawngzawh hi hmun hnih aṭangin neih ṭan a ni a, Kharasom junction leh Dungrei aṭangtein an zawh ṭan a, Ukhrul town ground-ah vantlang inkhawm an nei chhunzawm nghal a ni. Kawngzawh zingah hian zirlai naupangte pawh an tel a, kal khawmte hian framework agreement awm sa chu a khawi lam zawk tan pawha pawm theih a nih thu sawiin, Indo-Naga inremna chu ziah vat ni se an duh thu an sawi.

CAO WTR Sayai chuan pung khawmte hmaah hian thu sawiin, Indo-Naga inremna tura inbiakna kal mek chungchanga hmasawnna leh thlen tawh chinte a sawi lang. Sayai chuan,"2015-a framework agreement ziah tawh chu inremna neih nan a zahawm tawk a, India pawh hian Naga hnam danglam bikna pawh hi hmu tawhin, inremna siam tura hmalakna pawhin a vawrtawp a thleng ṭep tawh a ni," a ti. Naga hruaitute chuan India ram hruaitute nen Delhi-ah inremna ziah tumin inbiakna an nei reng a, framework agreement ang hian inremna ziah beisei a ni, hetah hian flag leh constitution pawh tarlan a nih thu a sawi bawk.

TKS president Ramreichan pawhin thu sawiin, Ukhrul-a kawngzawh chuan Indo-Naga inremna ziahna tur atana thlawpna a entir thu leh, inremna ziak tura Naga mipuite'n nghakhlel taka an thlir lai hian chhung lam leh pawn lamah harsatna a awm thei a, an ṭanho a ngaih zual lai tak a nih thu a sawi a ni.