UGC-in foreign university-te inkaihhruaina tur puang

University Grants Commission (UGC) chuan India-a ram dang aṭanga zirna in (foreign university) din turte tana an zawm tur inkaihhruaina an siam chu a puang. Inkaihhruaina an siam chu New Education Policy (NEP) dung zuia Foreign Higher Educational Institutions (FHEI) te hip nan leh India rama zirna in sang zawkte'n khawvel huap zirna kalphung an tem ve theih nana ti an nih thu an sawi.

Inkaihhruaina siamah chuan,"India rama inbun tum foreign institution te chu khawvel huapa ranking pekah a ṭha 500 zingah an tel tur a ni a, UGC hian hei hi a ennawn fo ṭhin ang. Hei hi an tlin lo a nih pawhin subject mal anga tehnaah khawvel huapa ranking 500 chung lam an hauh a ngai ang a, thil ṭhenkhatah thiam leh ṭhat bikna an neih a ngai bawk ang," tiin an tarlang. FHEI te hian ram dang aṭanga ṭanpuina an dawng duh a nih chuan Foreign Contribution (Regulation) Act, 2010 hnuaiah phalna lain registration an tih hmasak a ṭul ang a, FCRA dan leh hraite an zawm a ngai bawk dawn a ni. "India rama an inbun fel hnuah undergraduate, postgraduate, doctoral leh post-doctoral te tana certificate, diploma, degree leh research tiha neihna tur zirna kaihhnawih program hrang hrang an kalpui thei ang," tiin an tarlang bawk.

Foreign university-te hian anmahni behchhana study centre leh learning centre siam ang chi erawh an ti thei dawn lo thung. Zirna kaihhnawih thil thar an kalpui dawn reng rengin UGC hnen aṭangin phalna an lak hmasak a ngai bawk ang. Online emaw ralkhat aṭanga zirna kalpui theihna tur chi reng reng an nei thiang lo a, zir tur zawng zawng aṭanga 10% tling lo chin erawh online-a an zirtir phalsak an ni. University pahnih emaw a aia tam pawhin thawkhoin an din thei ang a, mahse, university tin te'n criteria siamte an tlin vek a ngai thung. University pakhatin campus pakhat aia tam an din pawh phal a ni a, mahse, campus pakhat atan hian dilna hran zel siam a ngai dawn a ni. FHEI-te hian zirna in din nan hian UGC-ah kum tin fee an pek a ngai lem lo a, phalna an lak laia fee an pek kha a tawk a ni. Zirna in din nana an mamawhte chu anmahniin an intum vek a ngai bawk a, zirlai admit leh concession pek te, scholarship pek leh zirtirtu lak chungchangah te chuan anmahniin university inkaihhruaina siam phalsak an ni.