Djokovic awmna Serbia an champion

ATP Cup vawi khatna chu Pathianni zan khan a hmawr bawk a ni a, final inkhel hmuhnawm takah Serbia chuan Spain 2-1 a hnehin an champion. Inkhel ngaihven hlawh berah Novak Djokovic chuan Rafael Nadal a hneh a ni.

Ken Rosewall Arena-a inkhelah match hmasa berah Spain tan Roberto Bautista Agut chuan Dusan Lajovic 7-5, 6-1 a hnehin an ram chu hma a hruai pui a, singles match khelh chhunzawm niin Nadal-a'n hnehna chang se la chuan chak tlang thei dinhmunah an ding.

Serbia tan chak ngei a ngai, hun pawimawhah Djokovic rawn ding chhuakin world number 2 hian number 1 Nadal chu inkhel inhnehtawk takah  6-2, 7-6 (7-4) in a hneh a, ram pahnih te 1-1 in an intluk chiah.

Match pawimawh

Doubles hmangin chak zawk zawn a ni a, chauh pawh sawi thei loin Djokovic a inlan chhunzawm. Serbian star hi Viktor Troicki nena ṭangdunin Pablo Carreno Busta leh Feliciano Lopez te chu 6-3, 6-4 a hnehin an ram chu hlawhtlinna an chanpui.

Kum 32 mi Djokovic chuan, "He hlawhtlinna hi ka dam chhungin ka hre reng tawh dawn, tennis ka khelh hun chhunga inelna ka hmachhawn tawhah chuan a nuam berte zinga mi a ni," tiin an ram tana hlawhtlinna an chan chungchang a sawi.

Djokovic leh Troicki te ṭangdun kha set hmasa berah 3-1 in an hniam hman. Chak lo tura ngaih ni mah se a zawna game nga lain set an la thei a, set hnuhnung zawkah an khingpui service chu a tir lamah chhuhsakin a tawp thlengin an talbuai tawh lo.

Spain tan an champion lo hi a uiawm a, an thiampuipa Nadal tan a pawi zual thei. World number 1 hi hard court bikah Djokovic nen an intawn hnuhnung pakuaah a chak lo vek. January 20 aṭanga khelh tur Australian Open-ah Serbian tlangval hi rinkai zawk a ni dawn.

Australian Open khelh ṭan nan ni sarih vel chauh a awm tawh a, Grand Slam vawi 19 champion tawh Nadal hi number 1 ni chungin a inlan dawn. Ram tan khel ṭha viau mah se a hmawr a bawk fuh tawk lo, major tournament lamah sulhnu ṭha neih a tum ang.

Ṭanpuina

ATP Cup hi kumin aṭangin mipa tennis team hmanga inelna an buatsaih a ni a, mipa tennis thuneitu sang hian tun laia ram kang vanga buai mek Australia ṭanpui nan £383,000 (Rs nuai 352) an pek tur thu an sawi.

ATP Player Council president Djokovic chuan, "Kan sum hi player te kaltlanga neih a ni, chhiat tawk leh a nghawng zawng zawngte kan tawrhpui a, ṭawngṭaina lamah pawh kan hre reng e," tiin a sawi.

Australia-ah tennis season an hmang mek a, ram kang a awm mek bawk avangin tennis player rilru a nghawng nasa. Serena Williams chuan Auckland Classic aṭanga a hlawhchhuah chu a lo pe tawh bawk. Roger Federer, Nadal leh Serena te hian Nilaini hian Melbourne-ah Rally4Relief exhibition an khel bawk ang.



Share this Post

Login to comment
No Comments