Barcelona forward Luis Suarez chu a khup hliam vanga zai a nih hnuin a chawlh hun chhung tur a hriat theih ta a, Uruguayan striker hi thla li tal a chawlh a ṭul dawn. 

Suarez hi Pathianni khan a khup hliam hi zai a ni a, zai a nih lai hian Barcelona lam chuan a chawlh chen tur puang chiang lo mah se Pathianni zan khan thla li tal chawlh a mamawh thu hi an sawi a ni. 

Spanish surgeon lar Dr. Ramon Cugat-a enkawlna hnuaia awm mek Suarez hi Spanish Super Cup semifinal-ah pawh khan a inlan a, Catalan club ṭantuten thu lawmawm lo an hre zui. 

Kum 32 mi striker hi a kum tam tawh mah se Barca tan player ṭangkai a la ni reng a, tun season inelna hrang hrangah match 23 khelhsakin goal 14 a khung a, La Liga bikah assist ngah ber ni mekin vawi sarih chu a ṭhiante goal khung tur a siamsak tawh. 

Share this Post