East Bengal-in goal 2 hum zo lo Aizawl FC an vêl

Mizo mipuiin ring ngam chiah lo mah se mamawh vangin point beiseina nen RG Stadium an pan a, Brandon VL Remdika leh Yuta Kinowaki te goal hmangin beiseina chu chak ngei ngei rinnaah a inthlak. Amaherawhchu hun tawp lamah Aizawl FC tawnhriat neih tlemna a lang a, East Bengal striker Ranti Martins-a'n minute 20 chhung lekin hattrick a siam a, Kolkata club-in hnehna an chang.

Inrinni chawhnu inkhelah Red and Gold Brigade-in point thum an hlawhchhuah avangin point 20 hmuin champion kawng an zawh chho leh a, Aizawl FC erawh in-khel danga Salgaocar FC-in Gil-bert Oliveira goal hmanga Shillong Lajong an hneh avangin tla thei dinhmunah an ding. MPL champion hnuaiah DSK Shivajians chiah an awm tawh a, Pune khaw club hi tun season-ah an relegate ve thei lo.

Mizo an mawi

East Bengal-in tun season-a a vawi khat nan an 'third kit' an rawn ha a, Kolkata club lian captain hi Mizo tlangval Robert Lalthlamuana a ni a, an khingpui Aizawl FC captain hi Mizo tlangval David Lalrinmuana a ni ve bawk. Mizoten professional football kawng an zawh theih nana sulsutu S. Malsawmtluanga chuan starting eleven a chang a, inkhel entuten Mizo player-te chungah ṭhat an chhuah a, Mama chungah zahna an lantir.

Minute 56-naah Mama hi India international midfielder Bikash Jairu-a'n a rawn thlak a, East Bengal jersey 28-in khelmual a chhuahsan lai hian Mizo mipuiin ding chunga kut bengin an lawm a, hman leh tun hre pha tan chuan hun hlimawm danglam tak a ni.

Goal hnih

East Bengal-in bul an ṭan ṭha hret a, Nigerian striker Ranti leh a kawppui Joaquim Abranches ten a hmawr an bawk fuh thei lo thung. Mikhual team tan right back Harmanjot Khabra a khel
ṭha a, Bengali coach hnuaia khel tih takah ball vawrh a tam a, an chevel hmuhnawm mah se an chungnung zawkna a tam lo.

Aizawl FC lam tan winger pahnih H. Lalmuankima leh Albert Zo-hmingmawia te an khel thei lo a, an aia lut Brandon VL Remdika leh Lalbiakhlua te an khel ṭha a, minute 19-na lekah Brandon-a'n goal hmahruai a khung. Minute 10 hnuaah Biaktea cross ṭha zet chu Bagan defender Bello Rasaq-a'n goalline aṭangin a pet chhuak bawk.

East Bengal-in an sipurh sut tumin Bikash Jairu luhtir mah se, minute 58-naah Bernard Mendy tihsual vangin Yuta chuan chance a nei a, Japanese midfielder hian chiang zetin a pet lut. Goal hnih a hmahruaitu Aizawl FC-in point thum an hmu ngei dawn niin a lang.

Penalty leh red card

Aizawl FC-in goal khung tam zawk mah se inkhelah an chungnung zawkna a lang lo a, first half-a Mehtab Hossain inhliam vanga lut Cavin Lobo-a'n second half-ah midfield a thunun chho a, Bikash Jairu-a'n attack a rawn tihnat sawt bakah goal hnih an chhuah hnua luhtir Mohammed Rafique a rawn khel ṭha nghal bawk.

East Bengal-in substitution pathum an siam hian Aizawl FC-in goal hniha hma an hruai bakah player pakhatmah an thlak loh avangin an dinhmun a ṭha hle.

Amaherawhchu MPL champion-in goal venhim aiin goal khung belh an dah pawimawh hmasa a, East Bengal midfielder-te'n Nigerian striker Ranti ball ṭha an pek reng avangin tawnhriat nei tlem Nigerian defender Emma-a'n a zawh tawk aia phurrit a dawng.

Emma hi Ranti a tihtluk vangin hnawhchhuah a ni a, a penalty a chawi chu East Bengal striker hian goal-ah chantirin inkhel boruak a danglam nghal hle.

Substitution leh goal 2 chhuah

Aizawl FC-in an goal neih sa humin tumin striker che ṭha lo Joel Sunday aiah midfielder H. Lalbiakthanga an luhtir a, midfield laia ṭangkai tak Yuta chu right back-ah an dah teh daih a, field sir dinglama East Bengal winger-te vengtu Chullova chu defence laiah sawn luh niin central defender Ronald Zothanzama chu bench-ah chhawr lohin a awm.

Hemi hnu hian right win--ger Biaktea aiah playmaker R. Malsawmtluanga an dah lut bawk.

Japanese player Yuta-a'n tun hmaa a khelh ṭhinna right back khelh dan hmang a hre bel tawh lo nge a ven tur a veng lo a, minute 85-naah a awmna dinglam aṭanga Bikash Jairu cross chu Ranti-a'n chiang zetin a tauh lut. Minute 88-naah dinglam aṭang bawka cross ball rawn lut tho chu Rafique-a'n a dummy hnuah goal ruakah Ranti-a'n a pet goal - RG Stadium a reh ṭhuap mai!

Hun tawp hma hretin Chullova leh inkhel entu ṭhenkhatin zir belh tur an la nei tih an chet zia hmangin an lantir a - khelmuala thil vawm lut tawk an awm! Armed Veng tlangval hian Ranti tlu chu zawn chhuah tumin ṭul lo takah a yellow card vawi hnihna hmuin hnawhchhuah a ni. March 26-a Aizawl FC leh Mohun Bagan inkhelh hunah Chullova leh Emma te an inlan thei lo ang.

Referee vang?

Aizawl FC coach Jahar Das chuan, "Referee vanga chak lo kan ni. Inkhelh ṭan tirh lam khan referee khan foul satliah a ham lo a, khatiang khan ham reng se a dik ni mai tur. Inkhel tawp lamah erawh foul ho te te thlengin a ham tawh a, penalty thutlukna kha chu ka sawisel lo a, amaherawhchu yellow card tur a ni. Mipui khan inkhel en tur ringawtin an lo kal lo a, kan chak lai hmuh telh an duh bawk avangin an thinrimna ka hrethiam a ni," tiin referee vanga an chak loh thu a sawi a; Bengali coach hian substitution an siam sual thu a sawi tel bawk.

East Bengal coach Biswajit Bhattacharya chuan, "Penalty leh red card thutlukna kha a dik a ni. Ka player-te an khel chhe lo a, first half-ah pawh khan Aizawl FC-in kan tihsual vangin goal an nei tih bak chu kan ṭhat loh zawkna ka hre lo. A hmaa ka sawi tawh ang khan Kolkata-ah pawh Aizawl FC hi kan hneh hram a, team ṭha an ni," tiin referee thutlukna a ṭawmpui.