Swiatek tan semifinal a hnai

Iga Swiatek chuan WTA Finals khelh laia semifinal lut turin a dinhmun a siamṭha ta hle. Polish nula hian Nilaini zan khan US Open champion Coco Gauff chu 6-0, 7-5 in a hneh a, group match vawi hnih a khelh tawhah hnehna a chang ve ve a ni.

Seeded pahnihna Gauff hian a match hmasa zawkah Marketa Vondrousova chu a lo hneh tawh bawk a, zanin zanlai hian seeded parukna Ons Jabeur nen an inhmachhawn leh ang.

Chak lo zawk Gauff hi kuminah a khel ṭha, ropui takin inelna lian US Open-ah hial a champion. Tun tournament an khelh laiah pawh hi mi rin hlawh zinga mi a ni, mahse tun ṭum chu Swiatek a ngam lo hle.

World number 2 Swiatek chuan, "Coco hi chu a beidawng ve ngai lo a, chuvangin inkhel awlsam tak kha ka beisei lo hrim hrim. Thli a thawt nasat deuh avangin khelh dan thiam pawh a harsa, a pawimawh laia service ka hmun thei hloh khan min pui hle," tiin a sawi.

Swaitek hian season hman ṭha pangngai viau mah se nikum lam a tluk lo deuh a, world number 1 a nihna pawh Aryna Sabalenka lakah a hloh, number 1 ni chung ngeia season khar a duh chuan WTA Finals champion nih a pawimawh.

Seeded pakhatna Sabalanenka pawhin number 1 nih tlang a tum, a match hmasa berah chak mah se a hnuah Jessica Pegula a hneh lo. Tukin hian seeded palina Elena Rybakina nen an inhmachhawn leh a ni.