Mizoram tan taekwondo an che ṭha: Silver medal pahnih hlawh chhuak

India ram pum huap inelna National Games 2023 neih laiah Mizoram chuan medal pathum a hlawh chhuak ta. Taekwondo huangah Mizoram hian silver medal pahnih la tawhin, a hmain weightlifting-ah gold medal pakhat an hlawh chhuak tawh bawk.

Goa khawpuia inelna neihah, Thawhlehni zan khan Lalthlamuanpuia chuan poomsae Individual category-ah silver medal a la a, nimin khan poomsae mixed pair khelh chhunzawm niin Vanlalhmangaihthangi leh Daniel Lalhumthanga te inkawp chuan silver medal an la leh bawk a ni.

Taekwondo Poomsae Individual category-ah mi pakuain inelna an hmachhawn a, final-ah mi pali an lut. Semifinal an khelh laiin Puitea leh Services Sports Control Board (SSCB) aiawhten point an hmu sang ber.

Final-ah pawh anni pahnih hi an che ṭha, mahse, Services aiawhtuin point 6.80 hmuin pakhatna dinhmun a luah a, Mizo tlangval Puitea'n point 6.67 hmuin pahnihna a ni a, a duhthusam tak thleng ta chiah lo mah se a thlen chin a sang hle.

Venghlui tlangval Thlamuanpuia hian Hrawva School aṭangin Moses Lalsangzuala hnuaiah taekwondo a zir ṭan a. Republic Vengthlang Club a zawm hnuah Remlalhlimpuia leh R.Lalchhandam ten kaihruai lehin, tunah chian Gidae Taekwondo Academy hawngin a zirtir mek bawk a ni.

Pair poomsae lama khel Vanlalhmangaihthangi leh Daniel Lalhumthanga te an inman hle. Semifinal-ah a tiṭha zinga pathumna niin final round an lut a, final-ah hmasawn leh hret mah se step 1 chetsual zeuh an neih avangin point 6.41 an hmu. Arunachal Pradesh chuan point 6.54 hmuin gold medal an la, an dawtah Mizoram awmin Delhi leh Manipur (6.24 Points) ten an dawt.

Mizoram contingent deputy chef de mission Joseph Thansanga chuan, "Taekwondo hi kan innghahna pakhat an ni a, beisei angin an khel thei hi a lawmawm. Thla khat chhung camp an neih chhawrin fitness, balance & accuracy-ah duhthusamin an ṭha.

"Gold medal pawh la thei dinhmunah kan ding a. Mahse, final round-ah chetsual zeuh an neih avangin point an hmuh tur an pha ta lo ani. Vawiin hian seeded no.1 kan nihnaah kan khel dawn a. An tisual a nih loh chuan gold medal ngei kan beisei," tiin Vanglaini a hrilh.

Thawhlehni zan khan Sepaktakraw-ah Mizoram team chuan Uttar Pradesh an hmachhawn a, 19-21, 21-17, 18-21 in an hneh lo. Nizan khan Goa leh Assam an hmachhawn zui a, an chak ve ve a nih chuan semifinal an la lut thei ang.

Mizoram hian Swimming-ah mi pakhat a tir chhuak - Lalrinpuii Fanai chuan 50m Freestyle hleuhin heat a paltlang zo lo a, nimin khan 50m Breaststroke hleuh zui leh mah se medal a hlawh chhuak phak lo a ni.

Inelna hi November 9 thleng neih a ni dawn - Mizoram hian boxing, judo, shooting leh wrestling huangah inelna bul an la ṭan lo. Inelna hmachhawn laklawh lai an la nei nual bawk a, medal dang lak beiseina a la awm.Mizoram tan taekwondo an che ṭha