Mumbai an chak zo lo

Inrinni zan Indian Super League inkhelah Mumbai City-in tun season match thum an khelh tawha la tlawm vek Hyderabad an mikhual a, 1-1 in an inhnehtawkpui. AFC Champions League-a Al Hilal laka tlawm hlim Mumbai vanneih zan a ni lo a, minute sarihna lekah goalkeeper Phurba Lachenpa chu Joe Knowles laka a foul avangin hnawhchhuah a ni.

Mumbai hian minute 76-naa Manoj Mohammed own goal hmangin hma an hruai ta tho a, mahse, Hyderabad hian hun pek belh minute ruknaa Tiri goal hmangin an chhanglet a, 1-1 in inkhel a tawp. Mumbai tan Lallianzuala Chhangte leh Lalengmawia Ralte ten inkhel bul an ṭan a, Hyderabad lamah Mark Zothanpuia chu minute 67-naah bench aṭangin a lut bawk.

Zirtawpni zan ISL inkhelah Kerala Blasters chuan 2-1 in Mizo tamna Odisha FC an hneh thung. Odisha tan Diego Mauricio chuan goal hmahruai khung mah se, Blasters hian Dimitrios Diamantakos leh Adrian Luna hmangin an chhanglet a, 2-1 in an chak daih.

Blasters tan Freddy Lallawmawma chu bench aṭangin a lut a, Odisha tan Jerry Lalrinzuala, Isak Vanlalruatfela leh K. Lalṭhathanga ten inkhel bul an ṭan a, Isak hian Odisha tan chance duhawm nei mah se a chhawr lo.