Neuer let zanah Kane a ropui

Thla 10 chuang hnuah Manuel Neuer a rawn kir a, Germany goalkeeper hian goal a chhuah lo. Inrinni zan Bundesliga inkhelah hian Bayern Munich-in Darmstadt chu 8-0 zetin an sawp a, England captain Harry Kane-a'n hattrick a siam. Red card pathum a awm a, goal pariat hi second half-a lut vek a ni.

Allianz Arena-a inkhelah minute lina lekah Joshua Kimmich hnen aṭanga a ball hmuh chu tiper sualin ball laksaktu Marvin Mehlem chu box pawn chiahah titluin hnawhchhuah a ni a, Bayern hi player 10-in an khel.

Mahse Darmstadt pawhin player 10 thoin an khel a, minute 21-naah box pawn chiaha Konrad Laimer titlutu Klaus Gjasula chu VAR en hnuah hnawhchhuah a ni a; minute 41-naah Harry Kane tihtluk vangin Matej Maglica hnawhchhuah a nih leh bawk avangin player pakuain an khel zui.

First half-ah player pathum hnawhchhuah a ni a, second half-ah pakhata tam zawk Bayern ṭhatna a lang. Harry Kane-a'n hattrick a siam bakah Leroy Sane leh Jamal Musiala ten goal hnih ve ve an khung a, Thomas Muller-a'n a khung bawk.

Goal lut zingah minute 69-naa Kane-a goal khung chu goal mawi bik a ni a, halfway line thlen hma aṭangin Darmstadt keeper Marcel Schuhen chu ṭha zetin a pet khum. Bayern 8-0 in an chak.

Bayern hian match kuaah point 23 hmuin hmahruaitu an ni a, chutihrualin nizan inkhelah Bayer Leverkusen-in Freiburg an hneh chuan Xabi Alonso hote hi pakhatnaah an awm leh ang.