First Division-ah Bethlehem Arsi a êng

ADFA First Division-ah FC Bethlehem an champion a, final-ah champion rinkai Kanan FC an hneh lo. Coach Lalhriatpuia Sailo kaihhruaina hnuaia Bethlehem zinkawng hi a ngaihnawm a, a tawpah an thawhrimna leh inpekna rah duhawm an seng. Season liam ta khan MPL aṭangin FCB hi relegate mah se First Division-ah erawh Bethlehem Arsi a êng e.

October 28, Inrinni khan Lammualah First Division final khelh a ni a, FC Bethlehem hian Ramthianghlima goal hmangin first half-ah hma an hruai. Mahse, injury time-ah Kananin penalty an hmu a, captain Lalhriatpuia Jongte penalty hmangin an sut. Extra time-ah an inhnehtawk zel a, penalty shootout-ah FCB 4-3 in an vannei.

Season ṭan hmain FCB leh Edgy Sports Management an inrem a, First Division-ah thawm an nei ring nghal. Mahse maw, inelna tak tak ṭan hmain an sponsor-te hi an inhnukdawk. Club lamin an intiam ang hi player hnenah an pek theih an beisei ta lo a, hun harsa an tawh lai hian coach Hriatpuia'n, "Hlawh chanvein kan khel ang," tiin club thuneitute a hrilh.

Hun harsa hian club thuneitute leh team chhung boruak ṭha zawk an siam phah a, chak duhin an tuihal a, an inlungrual bawk. Club president Lalruatsaka chuan, "Player hlawh a chanve-in kan pe lo a, a pangngai vekin kan pe. A hun takah hlawh pe thei lo mah ila, kan pe zel. Team boruak a ṭha êm êm bawk si. A tawp kharna lah a ropui. Football hmangin A ROPUINA a lantir chiang hle a ni," tiin an champion avangin Pathian a fak.

FCB champion puitu coach Lalhriatpuia Sailo pawhin, "Ka chunga rinna nghattu FCB OB te chungah ka lawm a, min ṭawiawmnaah ka lawm tak zet. Anni vang hian coaching pek a nuam a, champion tuma theihtawp chhuahtu player-te chungah ka lawm bawk. Pathian malsawmna kan dawng a, FCB min ṭantu veng chhung leh veng pawn mite tan kan champion nomawi hi ka hlan a ni," tiin Vanglaini a hrilh.