Arsenal leh Spurs inum zel

Premier League champion tum Arsenal tan Eddie Nketiah-a'n hattrick siamin hma lam an pan zel. Mikel Arteta naute boruak a ṭha, mahse an chungah Tottenham Hotspur an la awm avangin lunglawm a kim rih lo ang.

Inrinni zan Emirates Stadium-a inkhelah Gunners tan Nketiah bakah Fabio Vieira leh Takehiro Tomiyasu ten goal khungin, an mikhual Sheffield United chu 5-0 in an sawp a, league match vawi 10 aṭangin point 24 an hmu.

North London club pakhat zawk Spurs chu Zirtawpni zan khan an inlan, captain Son Heung-min-a goal hmangin Crystal Palace 2-1 in an hneh a, point 26 hmuin khelh zat inangah Arsenal aiin point hnihin an sang mek.

Hattrick

Hliam vangin Gabriel Jesus an chhawr thei lo a, manager Arteta-a'n Nketiah tan hmun a siamsak - kar laihawla Champions League an khelh chauh avangin captain Martin Odegaard leh defender Gabriel te pawh bench lamah hun hmantir an ni.

Hale End chhuak Nketiah-a'n midfielder Declan Rice hnen aṭanga a ball hmuh chu shot nuam tawk tur chiahin a dang per a, amah vengtu defender vir khumin goal a khung ṭan a, corner aṭanga ball kal zel chang fuh lehin an goal hnihna pawh a hlap lut.

Emile Smith Rowe-a ball pek chu box pawnah hmun awl a hmuh avangin a hlap leh thut a, keeper Wes Foderingham tan dan ngaihna a awm lo - mipui ṭhutna lam aṭangin Jesus chuan Nketiah hattrick hi ding chungin a lo lawmpui.

Hun tawp dawnah Vieira-a'n ama penalty hlawhchhuah a khung a, substitute Tomiyasu pawhin an goal ngana a khung - anmahni mualah Arsenal tan buaina tur a awm lo. Nilaini zanah West Ham nen League Cup khelin kartawpah Newcastle United an lenchilh leh ang.

Spurs boruak

Harry Kane tel lohna Tottenham Hotspur chu tlahniam deuh tura ngaih an ni a, mahse ngaih ang ngawt an ni lo - tunah chuan a kang sang zawngin an kal mek a, inkhel hmuhnawm chhawp chhuak chungin Crystal Palace an hneh.

Season hmang ṭha tak James Maddison-a cross chu Joel Ward chuan anmahni lamah a tilut a, mikhual team tan Son chuan hnai tak aṭangin an goal hnihna a khung, goal a luh theih nan Maddison bawkin a thawh hlawk hle.

Hun tawp dawna Jordan Ayew goal khungin Palace a chhanhim phak tawh lo. manager thar Ange Postecoglou enkawl Spurs an kan san zel laiin Crystal Palace erawhin table laihawlah hun an hman chhunzawm.

Postecoglou chuan, "Kar tin mai hi kan tan chuan chona thar a ni, midang ni loin keimahni khelh dan chauh kan ngaihtuah a ṭha a, kan thiam belh telh telh tur a ni bawk," tiin a sawi a, season tawpa an awmna tur erawh rin thiam a la harsa.