Ngannou lakah Fury a mualpho teuh!

WBC heavyweight champion Tyson Fury chuan, "Table tennis champion-in Wimbledon final-a Novak Djokovic a hmachhawn ang a ni ang," tiin UFC fighter Francis Ngannou nena an intawn tur sawi lawk mah se, hnehna chang turin vanneihna a mamawh.

Saudi Arabia-a inhnek hmuhnawmah Fury hi split decision hmangin a chak hram a, judge pahnihin Fury hi 96-93 leh 95-94 a chakah an puang a, judge pakhat chuan Ngannou hi 95-94 a chak zawkah an puang thung - a vawi khat boxing ring luhnaah Ngannou hian boxer ropui Fury a hneh nghal teuh hle.

Kum 37 mi Ngannou hian round thumna lekah Fury hi a hnek tlu hial a, mahse, British boxer hi a tho leh thei. Fury chuan, "Ka beisei lawk angin thil a thleng lo chiang hle. Min hnek tlu a, mahse, ka na lo hlauh a, ṭha taka thoin pangngai takin ka fight leh thei a ni.

"Pa dangdai tak, hnek thiam tak a ni a, ka zah taket. Tun hnai kum 10 chhunga ka fight hautak ber zinga mi min hmachhawn tir a ni," a ti a, he fight-ah hian Fury kawnghren kawl lai WBC heavyweight title chu inchuh a ni lo.