El Clasico danglamna Bellingham

Mumang ramah Jude Bellingham a chen chhunzawm zel - English midfielder hian El Clasico-a a match hmasa berah goal hnih a khung nghal a, Real Madrid chu Barcelona lakah 2-1 in hnehna a chanpui.

Barcelona khelmuala inkhelah mualneitu Barca tan Ilkay Gundogan chuan minute rukna lekah goal hmahruai a khung a, first half-ah goal dang a luh zui loh avangin Catalan club boruak a ṭha.

Second half ṭantirah Barca defender Inigo Martinez chuan post a tihper zui a, a per lehlam Ronald Araujo-a 'shot' chu Real Madrid keeper Kepa Arrizabalaga chuan ṭha zetin a dang bawk a, Fermin Lopez pawhin post a tihper.

Mahse, second half-ah Jude Bellingham 'show' kan hmu - kum 20 mi midfielder hian minute 68-naah yard 30 vela hla aṭangin mawi zetin si phurh sutna goal a khung a, hun pek belhah chak nemnghehna a volley goal bawk.

Bellingham-a'n tun season inelna hrang hrangah Real tan match 13 khelin goal 13 a khung ta a, assist vawi thum a nei bawk - euro maktaduai 103 man midfielder hian a man a to tawk lo tih a pholang zel.

Real boss Carlo Ancelotti chuan, "A goal hmasa zawk kha goal ropui lutuk a ni a, a goal hnihna khung turin fing takin a che bawk. Mak kan ti zawk - Real ami zawng zawngin tlarhma lama a che thei lutuk hi mak kan ti vek.

"Box chhungah a lut fo a, a goal hmasa zawk phei kha chu mak tiin kan thlir tawp. Tun dinhmunah chuan ani hi danglamna thlentu a ni," a ti a, a player a fak hle.