Kahaiya'n Afzal puala inkhawm cancel tumna a dodal : Registrar
Jawaharlal Nehru University (JNU) Registrar Bhupinder Zutshi chuan JNU Students' Union president Kanhaiya Kumar chuan university campus-a firfiak Afzal Guru hriatrengna inkhawm buatsaih tum, university thuneituten cancel an tumna chu a dodal a ni, a ti.
February 9-a campus-a Parliament beitu, thiam loh chantir khaihlum tak, Afzal Guru hriatrengna inkhawm, zirlai ṭhenkhatten an buatsaihah hian India dodal leh hel zawnga thu sawiah puhin Kanhaiaya Kumar hi thubuai siamsak a ni. Tihar Jail-ah hun eng emaw chen dah a nih hnuin Delhi High Court chuan thla ruk chhung atan bail-a chhuah a ni.
BJP-in Kanhaiya a tilar: Shiv Sena
BJP thawhpui, Shiv Sena chuan Jawaharlal Nehru University (JNU) Students' Union presdent Kanhaiya Kumar chu a thlawnin BJP chuan nasa takin a ti lar ta zawk a ni, a ti. Ram dodala puh midangte an la tan laia Kanhaiya'n reilote hnua bail a hmuh theih mai dan chu an hriat duh thu an sawi bawk.
Sena chuan an pawl chanchinbu, Saamana-ah hemi chungchang hi nimin kha a chhuah a, 'Union Minister Venkaiah Naidu chuan Kanhaiya Kumar chuan free publicity a hmuh phah ta niiin a sawi. Hei hi a dik a nih chuan, tunge free publicity a neih theihna kawnga mawhphurtu chu ? Tunlai khawvelah chuan engmah hi a thlawn a awm thei tawh lo" a ti.
Shiv Sena chuan, " Thil te ber pawh a man pek vek a ngai tawh. Hnathawktu, PF-a an sum khawltute pawhin an thawh hlawh aṭang ngeiin chhiah an pek a ngai tawh. Sorkar hian a thlawnin mipuite hnenah engmah pek a ni loang tih a lantir tawh a ni" tiin a sawi.
Gujarat-a Patel hnam puala reservation siam phuta nawrh huaihawtnaa an hotu, Hardik Patel chu ram dodal zawnga cheah puhin man a ni a, a ni bakah ram dodala puh dang Colonel Purohit leh Sadhvi Pragnya-te pawh tun thlengin jail-ah tantir an la ni. "Midangte jail-a an tan laiin eng vangin nge Kanhaiya hian awlsam taka bail a hmuh theh ? Jail-a tantir a nih khan sorkar tan harsatna siamin, zawhna hrang hrang chhan tur sorkarin ngah dawn lutuk tihna em ni?" tiin a zawt.