Zanin dar 7:30 hian Aizawl FC leh Chanmari FC ten RG Stadium, Mualpuiah MPL8 semifinal hmasa zawk an khel dawn.

I League club hian table-a pakhatna ni chungin knockout stage an thleng a, Chanmari FC erawh pahnihnaa awm Mizoram Police-in BN Mullick Memorial All India Police Football Tournament an khelh dawn avang chauha semifinal khel thei an ni.

League table thlirin Aizawl FC hi team ṭha zawk tura ngaih ni mah se Standly Rosario hote hian tun season-a Chanmari FC vawi thum an hmachhawn tawhah chak an la nei ve lo.

AFC-in I League khelh tur an neih kawp laiin Chanmari erawh MPL-ah an insawrbing thei a, fixtures thlir chuan MPL8-a pangana hi an dinhmun a ṭha zawk.

Chanmari an ṭha tawk

Chanmari FC-in Aizawl FC hi I Day Football-ah 3-1 in an hneh a, MPL-a vawi hnih an intumah an inhnehtawk ve ve.

MPL8-ah Chanmarians hi S. Malsawmtluanga hoin bul an ṭan a, player lakluh nan sum an hmang bawk a; nimahsela Chanmari hian beisei an pha lo a, season tluanin palina pawn lamah an awm tam zawk.

 Chutih rualin chik zawka Chanmari team chhung thlir erawh chuan MPL-a vawi hnih champion tawh hi a lungthu kim nana nomawi chawi turin an ṭha tawk.

Chanmari hian midfield ho turin Rochhingpuia an chhawr leh thei tawh a, Chhinga hoa MPL an khelh chhunah Ramhlun North 5-0 in an sawp. Hei bakah hian season tir lama fitness ṭha tawk lo David Lalrinmuana leh MS Dawngliana ten ngai an awh chho a, boruak sangah an tawnhriat a pawimawh ang. 

Zemabawk North tlangval David-a hian goal li khung tawhin an forward pahnih Lalnunzama leh Lalremruata te nen an khung zat a inang.

Aizawl FC captain hlui David-a danglamna chu goal li zinga goal thum hi freekick aṭanga a khung a ni a, I League club lakah hian freekick hmangin a a khung bawk.

Aizawl FC lam hi...

Aizawl FC coach Standly Rosario-a'n Mohun Bagan nen an inhnehtawk ṭumin MPL-a an club top scorer F. Lalremsanga squad-ah a dah lo a, inkhelh banah MPL-ah a inlan tur thu a sawi. Lengpui tlangval Remsanga hian MPL8-ah goal 10 a khung tawh a, Chanmari FC lakah goal hnih a khung. 

Remsanga hi winger ṭha Rochharzela leh Isak Vanlalruatfela te nen an inkawp a nih chuan Chanmari tlar hnung tana buaina tham an ni ang. 

CFC tana dan harsa ber tur erawh Alfred Kemah Jaryan a ni a, Aizawl FC captain hi Standly-a'n tlar hma lamah chhawrin MPL8-ah pawh goal riat ngawt 

a khung tawh.

Aizawl FC inchhuanna erawh an tlarhnung a ni a, Richard Kassaga hoin MPL club zingah goal an chhuah tlem ber. Mimal anga an ṭhatna piah lamah team angin an inrem phui ṭha a, hemi kawngah hian coach tawnhriat nei ṭha Standly kut hnu a hmuh theih a ni.

Mipui an tam dawn

RG Stadium zan inkhel tur a nih avangin entu an ṭha dawn a, Chanmari hi tun hma aṭanga awmze neia au thiam veng an ni. Tun ṭumah hian MPL record neih ṭhat lama an tluk loh awm chhun Aizawl FC an hmachhawn dawn a, an elpui hneh theihna hun ṭha an neih hi bawhpelh an duh lo a nih chuan mipui an thawhchhuah tam a ṭul ang.

Aizawl FC tan RG Stadium hi I League an khelhna hmu)n a nih avangin an tlangnel dawn a, Red Army lam pawhin inkhel pawimawhzia hriain thapui an chhuah ngei a rinawm.

Inkhel entute hi kawr sen leh pawlin an inthliar dawn a, fans pawh an hmuh-nawmin an ngaihnawm tham ngei ang.

Share this Post