Remkimi Cherput Thla li hnuah pakhatnaah
Mizo Idol aṭanga kan hriat lar, a aw danglam, thâm ngaihawm tak Remkimi Cherput kha tunah chuan Hontrade International Ṭhazual Lengzemah pakhatnaah kan hmu ta. A hla 'Zoawi lelte a fam ta' tih hla top 10-a kan hmuh aṭanga thla linaah Remkimi Cherput hian pakhatna a rawn hauh thei ta a ni.
Remkimi Cherput hla hi 'Zoawi lelte a fam ta' tih hla kha a ni a, he hla hi zaithiam lar ṭhin, tuna rawngbawlna luhchilh a, a hun zawng zawng Pathian rawngbawl nana hmang ta, RTC Lalduhawmi phuah a ni.
'Zoawi lelte a fam ta' tih hla hi November 2 khan top 10-ah kan hmu ṭan a, 10-naah a awm a, November 16 khan pakuanaah a awm a, November 30 kha chuan palinaah a rawn kai chho thei tawh a ni. December 14 khan pathumnaah a chho a, January 11, 2016 khan pathumna bawk a luah. January 25 khan pahnihna a thleng chho a, pakhatna a kai mai tawh dawn emaw tih laiin, Lawmi Khiangte a hmaah a awm a, a kal vanglai tak a nih avangin pakhatna a ni lawk thei lo. February 8-a Ṭhazual Chart tihchhuah lehah pawh pa-hnihna tho a luah a, February 22-ah pawh pahnihnaah bawk a awm leh. March thla kan kai erawh chuan a dinhmun a rawn ṭha a, Remkimi Cherput hian pakhatna a rawn luah ta a ni.
A zawna chawlhkar li chhung ngawt mai pakhatna a hauh hnuah Lawmi Khiangte hla hit 'Kan hlim lai' tih chu pahnihnaah a chhuk thla. Lawmi Khiangte hi kumina pakhatna hauh ngun ber a ni a, kumina a zawna pakhatna vawi li hauh thei awm chhun leh la hmasa ber a ni a, anni aia hlawhtling tur hi kuminah an awm ang em? Khûm chu a harsa ve viau ang.
Pensy B. Lalthangliani chu a rawn invawrh sang chak hle a, pathumnaah a rawn kai ta dêr mai. Zonet-in chart a tihchhuah, lengzem leh faknaa top 10-a lang thei ve ve hla nei hi an tam lo khawp mai a, Lancy Remlalhruaii kha a ni deuh mai a, Lancy-i khan a lehlam ve veah pakhatna a hauh ve ve thei a, Pensy hian Lengzemah hian pakhatna a rawn hauh ve theih ngei a rinawm.
Hontreade International Ṭhhazual Lengzemah hian lang thar an awm lo a, a hmaa mite an la awm kim. Top 5 chinah F. Zomuanpuia leh Samuela Chhangte & Sangkimi Khiangte te an lang.
Hontrade International Ṭhazual 10
1 Remkimi Cherput - Zoawi lelte a fam ta
2 Lawmi Khiangte - Kan hlimlai
3 Pensy B Lalthangliani - Chelh ding rawh
4 F Zomuanpuia - Don't let me down
5 Samuel Chhangte & Sangkimi Khiangte - In ṭhen lawng
6 Mampuii Thlauhthang - A pawi ngei e
7 TRC Various Artists- Romanians
8 J& J - Ka hmangaih ber che
9 Ananda - Zo lanu leng
10 Mathlenga - Mizo thawnthu