Zu endik tura thawnah A ṭhat lohna hmu lo

Health department hnuaia Food and Drugs Administration (FDA) in endik tura phai lama zu sample a thawnthlakte chu laboratory ah endik a nih hnuah a ṭha vek niin FDA hotute chuan Vanglaini an hrilh.

FDA hian Mizorama zu zawrh hrang hrang zinga chi riat la chhuakin January 25, 2016 khan Guwahati Public Health Laboratory-ah endik turin an thawn thla a, chemical examiner-te'n an endik hnuah result hi March 3 khan fax-in FDA an rawn thawn a, zu endik zingah hian mihring tana hlauhawm pai hmuh a ni lo.

Endik tura thawnthlakte hi Whiskey pakhat, rum panga leh beer pahnih a ni. Chungte chu:- Bag Piper Whiskey, Contessa, Jolly Rogers, Gold Club Rum, ZoRum, MC Dowells Rum leh Myanmar siam beer pahnih, Dagon leh Diablo an ni.

Diablo leh Dagon hi Mizoramah hmuh a ni ve reng sia, rinhlelh vang liau liauin an thawn thla tih FDA hotute chuan an sawi.

FDA hotute chuan tuna endikte aṭhat vang hian result hi rin reng tur a ni lo a, ei leh in lam thil dang ang thoin a khat tawka endik tur a nih thu Vanglaini an hrilh.