Juventus keeper Gianluigi Buffon-a'n holam taka goal a chhuah avangin Turin club-in goal hnih an chhuah a, Italian champion hi an mikhual Sassuolo nen 2-2 in an inhnehtawk.

Pathianni zan inkhel dangah Inter Milan chuan SPAL 2-1 in an hneh thung, match 14 khelh aṭanga point 37 neitu Antonio Conte naute hi Serie A hmahruaitu an ni leh ta - nomawi inchuh boruak a sang zel dawn.

Chetsualna

Juve manager Maurizio Sarri-a'n keeper Wojciech Szczesny aiah Buffon a luhtir a, a tisual. Italian keeper hi Jeremie Boga nen an inhmachhawn ṭumin goalline 

aṭangin a tlan chhuak a, Sassuolo midfielder hi nangching leh hman si loin laklawh takin a ding - Boga hian chiang zetin a chip khum.

Goal hnihna an chhuah danah ball pet chhuak sualtu defender Leonardo Bonucci chu tisual hmasatu a ni a, chutihrualin Francesco Caputo-a ball pet na vak lo chu Buffon-a'n lo bawh sualin holam takin an goal-ah a lut.

Juve goal hnih hi Bonucci leh Cristiano Ronaldo (penalty) ten an khung a ni a, Sassuolo keeper Stefano Turati chuan Ronaldo freekick ṭha zeta a dansak bakah striker Gonzalo Higuain, Paulo Dybala leh Aaron Ramsey te goal khung tur chu a dang bawk.

Italian manager Sarri chuan, "Tihsual hi chu a awm thei, inkhelah 100% rilru kan pe lo a nih phei chuan tihsual hi a awm awlsam bik," tiin Buffon chungchang a sawi. Penalty chhuih luttu Ronaldo pawh a hliam dam hnuah ṭha taka a khelh theih vangin a lawm thu a sawi bawk.

Inter an sang

Tun hnai season riat chhung zet chu Juventus hian Serie A-ah ro an rel tawh a, anmahni nek buai phaktu an awm meuh lo. Kuminah erawh Conte-a'n Inter a enkawl hnuah awlsam takin an nomawi an humhim dawn bik lo niin a lang ta.

Inter tan Lautaro Martinez-a'n first half-ah goal hnih a khung a, inkhel chawhnu lamah SPAL lamin Mattia Valoti hmangin goal khat an nei ve. Goal hnih khungtu Martinez hian hattrick siam theihna hun ṭha nei mah se goalkeeper Etrit Berisha chuan a goal thumna a khung tur chu ṭha takin a dansak.

Kum 22 mi Agrentine striker hi Conte hnuaiah a vul mek; tun hnai inelna hrang hranga a match 12-ah goal 12 a khung tawh a, Inter tlarhmaah Serie A goal 10 khung tawhtu Romelu Lukaku a awm bawk avangin an khingpuite tan an hlauhawm hle.

Inkhel dangah AS Roma chuan Hellas Verona 3-1 a hnehin palina dinhmun an luah. December 6, Zirtawpni zan hian Roma leh Inter te hi an inhmachhawn zui dawn a, manager Conte naute hi karleha Champions League khelh zui ngai an nih avangin an hna a hautak dawn.

Share this Post