Leicester ban phakah nomawi

Premier League 2015-16 season-a mak taka champion nomawi chawitu Leicester City-in football thilmak thlen nawn tir turin kawng dik an zawh chhunzawm zel a, an ban phakah nomawi a inchhawp.

Brendan Rodgers-a naute hian an mikhual Everton chu point an insem pui mai dawn nia a lan hnuin injury time-a Kelechi Iheanacho goal hmangin 2-1 in an hneh a, hmahruaitu Liverpool nena an inkarah point riat chiah a awm leh ta. 

Season hmang ṭha lo Everton tan Richarlison chuan minute 23-naah goal hmahruai a khung a, Foxes tan Ben Chilwell-a'n penalty a hlawh chhuak emaw a intih chu VAR hmanga ennawn a nih hnuah sut a ni. 

Thil thlen dan ngaihtuahin Everton an chak ve mai a rinawm a, thil pawi tak erawh Foxes-in Jamie Vardy an lo nei kher hi a ni. English striker hian minute 68-naah si phurh sutna goal a rawn khung. 

League match a khelh hnuhnung 13-a goal 13 khung thei Vardy hian goal hnihn khungna remchang a neihah hlah mah se hun pek belhah Kelechi Iheanacho chuan point thum a hlawhchhuahpui ta tho a, Foxes chak dan  hi 'champion zia' tia sawi theih a ni. 

Leicester hian an elpui Liverpool leh City angin squad nei chhah tawk lo mah se hliam vanga an buai a nih loh chuan an starting XI hi result duhawm hlawh chhuak zel turin an ṭha tawk a, Reds leh City tan ngaihngam taka awmna chi a ni ta lo. 

Minute 62-naa bench aṭanga luhtir Iheanacho goal khung hi VAR hmanga ennawn a nih hnuah pek a ni a, Vardy goal kha a assist a ni bawk. 

Foxes manager Brendan Rodgers chuan, "Ka ngaihdan chuan chak kan phu a, first half-ah khan goal an ven tlat avangin kan tan harsa mah se kan nawr chhunzawm reng a ni," tiin a naute khelh dan a fak. 

Everton manager Marco Silva chuan, "Hei aia result ṭha zawk hi kan phu," tiin a sawi a, dinhmun him loa sawi coach hi a dinhmun a him lo lehzual ta hle - he thuziak i chhiar meuh chuan an inban fel tawh hial mai thei!



Share this Post

Login to comment
No Comments