UPC (NE)-in pastor lak thar tur Nupuite hna nghet neih an remti lo

UPC North East India, North Mizoram District Conference, March 3 aṭanga Tlangnuam playground-a neih chu Pathianni zan khan a ṭiak. Khawmpuiah hian pastor lak thar tur nupuite chuan hna nghet an nei tur a ni lo, an ti.

Rorel inkhawmah hian pastor nupui sorkar hnathawkte chungchang sawiho a ni a, 'Tun aṭang chuan pastor lak thar tur reng reng an nupuite'n hna nghet an nei tur a ni lo' an ti a, pastor thawk lai mek zinga sorkar hnathawk nupui neite erawhchu ngaihnathiam ṭha an ti thung.

Upa leh licence holder an thih a, biak-ina vui ṭhin chungchang, tualchhung kohhran thuneihnaa an dah ṭhin chu, rualkhai zawka kal a nih theih nan biak-inah ruang laluta invui tawh loh nise, an ti a, kum 2016 chhungin rawngbawlna hna uar zawka kalpui a, beihpui thlak pawh an rel.

Conference-ah hian thupui 'Hma i sawn zel ang u' tih chu Rev. C. Lal-rammuana, Rev. C. Lalmuan-puia, Rev. Laltluanga, Rev. Zohmingthanzama, Rev. Rosanga Kawlni leh Pastor Vanlalruata-te'n an sawi.

March 5 khan kum 2016 - 2017 chhunga hruaitu tur an thlang a, district superintendent-ah Rev. C Lalrammuana, secretary-ah Rev. Laltluanga leh secretary-ah Rev. Chhiarpuia te an thlang.