Goal hnih khung United leh Arsenal chak zo lo

Freddie Ljungberg kaihhruaina hnuaia an match hmasa berah Arsenal chu Norwich City nen 2-2 in an inhnehtawk. Manchester United pawh an hawi 'pir' thei bik chuang lo, an mikhual Aston Villa nen goal hnih ve ve khungin point khatah an lungawi a ngai ve tho bawk.

Premier League match 14 khelh tawhah Gunners (19 points) leh United (18) te sulhnu a ropui lo a, pariatna leh pakuana dinhmun luahtu an nih avangin season tawp hunah a sang pali zinga tel phak pawh a hautak tawh khawp ang.

Arsenal an vannei

Carrow Road-a inkhelah Norwich City lamin Teemu Pukki (21') leh Todd Cantwell (42+2') te hmangin ṭum hnih hma an hruai a, mikhual Gunners lamin striker Pierre-Emerick Aubameyang goal hnih hmangin an chhanglet.

Defender Christoph Zimmer-mann-a'n handball vanga a penalty chawi chu Aubameyang-a'n petin keeper Tim Krul chuan ṭha takin a dansak. Mahse, Auba-a'n ball a pet hma hian Norwich player te box chhungah an lo tlan lut a, pet nawn niin a hlah tawh lo.

Tlarhnung pawp Arsenal-in Cantwell an ven hneh loh avangin an goal hnihna an chhuah. Corner aṭanga ball lo kal chu Gabon international Auba bawkin hnai tak aṭangin an si phurh sut nan a hmang leh thung. Hun tawp dawn lamah Shkodran Mustafi leh David Luiz te inkawp phui lo tak chu keeper Bernd Leno-a'n a chhanhim.

A sang pali

Unai Emery an ban hnua manager lailawk Ljungberg-a'n a naute a chakpui zo chuang lo a, league match hnuhnung parukah chak ni hmel an hmu ta lo - 2011 a an record chhe tak chu an nih rual chiah.

Ljungberg chuan, "A bul kan ṭan fuhin inkhel kan thunun, mahse chuti chung chuan awlsam takin min paltlang lawi si. A tir lamah kha chuan training-na hmuna kan zir leh ruahman dan pawh kan ti chhuak nual.

"Amaherawhchu goal kan nei thei mai lo a, kan chhuah bawk. Arsenal hi ṭha taka khel turin ka duh a, tun ṭumah hian chak lo mah ila thil lawmawm tam tak ka hmu," a ti. Gunners player hlui hian a club hi a sang pali zinga an tel phak ngei a rin thu a sawi bawk.

Solskjaer a lawm lo

Old Trafford-a inkhelah Aston Villa lamin Jack Grealish-a goal hmangin hma an hruai a, mualneitu United lamin Tom Heaton-a own goal hmanga an sut hnuah Victor Lindelof chuan hmahruaina goal a khung.

An mualah Man United hi chak thei tura ngaih an ni a, amaherawhchu Tyrone Mings-a EPL goal hmasa ber hmangin Villa lamin an sut, manager Ole naute hi point khatah an lungawi a ṭul.

Man United manager Solskjaer chuan, "Match tam takah hma kan hruai ṭhin, 1-0, 2-1 leh 3-2 a hma an hruai hnuah goal kan chhuah leh ṭhin avangin kan chak zo lo leh mai ṭhin. Tun ang aia ṭha zawka khelh chhuah hi chu a ngai a ni.

"Old Trafford-a goal kan chhuah a nih chuan a sut leh theihna hun a awm ṭhin. Mahse, 2-1 a hma kan hruai hun chhung khan minute hnih chauh a ni, hmahruaina kan humhim thei lo ṭhin hi chu a lungawi thlak loh hle," tiiin a sawi.

United manager hian EPL a ngaipawimawh a, kar hmasa khan Europa League an khelhnaah pawh senior player a hruai lo. Naupang rual nen a zin hlan hian assistant coach Michael Carrick leh Kieran McKenna te chuan training an lo neihpui.

Mahse, hahchawlhna hun nei tam senior player ten beisei an phak chuang lo a, inkhel tawp lamah anmahni fans lam ngeiin an au el. United fans hian Arsenal leh Tottenham anga an manager ban mai pawh an pawiti tawh lo a nih hmel hle.



Share this Post

Login to comment
No Comments