Player 10 JFC-in Mumbai an chelh

Thawhṭanni zan Indian Super League inkhelah Jamshedpur FC-in minute 28-naa Aitor Monroy hnawhchhuah a nih avangin hun tam zawk player 10-in khel mah se point an hlawh chhuak tho a, hmahruaitu Mumbai City nen 1-1 in an inhnehtawk. 

Jamshedpur tan Nerijus Valskis chuan minute kuana lekah goal hmahruai a khung a, a finishing a tawih tluk zetin ball siamsaktu Jackichand Singh-a 'assist' a mawi bawk.

JFC tan Monroy chuan freekick hmangin khung belhna remchang a nei a, mahse a vanneih zan a ni lo - Mumbai zawkin minute 15-naah an si phurh an rawn sut a, Paris Saint-Germain striker hlui Bartholomew Ogbeche-a khung a ni.

Minute 28-naah a yellow card pahnihna avangin Jamshedpur midfielder Monroy chu hnawhchhuah zui a ni a, Mumbai dinhmun a ṭha sawt - mahse, tun season ISL-a team hmuhnawm ber pawl hian a tam zawk nih an chhawr thei bik lo a, Ogbeche, Ahmed Jahouh leh Rowllin Borges-ten an hun ṭha neih an chhawr lo vek - Borges hian goal ruakah a pet over!

Player tlem zawk ni mah se Jamshedpur an nep duh bik lo - Manipur winger Jackichand chuan minute 41-naah hun ṭha a nei a, a chhawr lo thung. Lithuanian striker Valskis-a'n goal a khung belhah inngai mah se offside vangin pawmsak a ni lo bawk. 

Jamshedpur tan Laldinliana Renthlei chu East Bengal nen an inkhelh ṭuma red card a hmuh avangin a inlan thei lo. Hetihlai hian left back Ricky Lallawmawma leh striker William Lalnunfela ten inkhel bul an ṭan a, Isaac Vanmalsawma chu minute 70-naah bench aṭanga luhtir ni mah se result thlak danglam turin hun a tam tawk tawh lo. 

Zanin dar 7:30-ah ATK Mohun Bagan leh FC Goa an inkhel dawn a, club pahnihah hian Mizoram player an awm lo ve ve.