Kanhaiya Kumar poster vangin thubuai ziak lut

Delhi Police-te chuan Jawaharlal Nehru University Students' Union (JNUSU) president Kanhaiya Kumar kaphlum thei hnenah lawmman, cheng nuai 11 pek a nih tur thu ziahna poster siam anih avangin thubuai an ziak lut.

Press Club-a Purvanchal Sena pawl hminga poster siam tartu mi pakhat chu an man a, a thurualpuite erawh an tlanchhe hman a ni. A mantute hian police hnenah an thlen nghal a ni.

Senior police officer chuan, Parliament Street police station-ah thubuai ziah luh a nih thu a sawi. Poster tartu pawh chu thu zawhfiah a ni a, khawi hmun aṭanga tihchhuah nge tih te an chhui mek thu a sawi.

Poster-ah hian " Mi tu pawh JNU zirlai pawl president leh ram dodaltu Kanhaiya kaphlum theih hnenah chuan Purvanchal Sena hmingin lawmman cheng nuai 11 pek a ni ang" tiin a inziak. Purvanchal Sena president Adarsh Sharma hming leh, a mobile phone number-te ziah lan a ni a, mahse number tarlan hi biak tlang theih a ni lo.