Mourinho enkawl Spurs chak zel

Tottenham Hotspur chuan Inrinni zan khan an mualah AFC Bournemouth chu 3-2 in an hneh. Jose Mourinho hote tan Dele Alli chuan goal hnih (21', 50') khungin Moussa Sissoko-a'n (69') goal khat a belh.

Portuguese manager Mourinho hnuaiah Spurs-in match thumah hnehna an chang vek a, league match hnihah an chak zawn bawk avangin panganaah an invawrh chho. 

Spurs tan lawm lohna tur a awm a nih chuan goal an chhuah leh ṭhin hi a nih a rinawm a, Bournemouth nen an inkhelh ṭum pawh hian 3-0 a hma an hruai hnuah goal hnih an chhuah. Goal hnih hi Cherries midfielder Liverpool aṭanga an hawh Harry Wilson (73', 90+6') khung a ni.

Jose Mourinho chuan, "Spurs ṭantute hian club an hmangaih a, kei hi manager atan min pawm. Tun dinhmunah chuan min ngaina ka la ti ngam lo a, hun lo kal turah erawh min ngaihnatna tur tam tak a la awm chho ang," tiin Spurs ṭantute lawmna a siam zel tur thu a sawi a, goal hnih khungtu Dele Alli a fak bawk.



Share this Post

Login to comment
No Comments