Vanglaini - ISL kartawp inkhelah chak awm lo

KHAWTHLIR

Youth Conclave-ah tel

Inrinni khan Guwahati-ah Youth Conclave 2019 buatsaih a ni a, Mizoram aṭangin Lok Sabha MP C Lalrosanga leh MFA honorary secretary Lalnghinglova Hmar te telin, thupui thlan bik hmangin thu an sawi. Youth Conclave-ah hian hmarchhak state aṭangin kawng hrang hranga mi hlawhtlingte an tel a, kawng hrang hranga hmarchhak hmasawn dan tur an sawiho a ni.

Thisen pe

November 30, Inrinni khan Champhai Vengsang Pastor Bial KṬP-te'n Champhai District Hospital tan thisen unit 34 an pe a, petute mipa 28 leh hmeichhia paruk an ni. Luangmual West Branch KṬP-te'n an kohhran hall-ah blood donation camp huaihawtin, Synod Hospital tan mipa 19 leh hmeichhia pahnihte'n thisen unit 21 an pe a; Serchhip Hmarveng Branch KṬP pawhin Serchhip District Hospital tan thisen unit 20 pein, petute mipa 13 leh hmeichhia pasarih an ni.

Anganwadi tlawh

Social Welfare minister Dr K Beichhua chuan November 29, Zirtawpni khan Siaha district-a Phúra, Vahia, Khopai leh Siatlai khuaa anganwadi centre-te a tlawh a; anganwadi chu a nihna tur ang taka kalpui a nih chuan naupangte hriselna leh an ṭhan lenna atan thil ṭha a nih thu sawiin, khawtlang hruaitute leh anganwadi worker-te chu anganwadi hmasawnna tur ngaihtuah reng turin a chah. Beichhua hian November 28 khan Mara Thyutlia Py (MTP) General Conference a hmanpui bakah, Zyhno khuaa Mary Hechia Residential Special School a tlawh bawk.

SBA street play

Sorkar laipui hnuaia North East Zone Cultural Centre leh Mizoram Art & Culture department chuan Swachh Bharat Abhiyan (SBA) pualin November 29, 2019 khan Republic Vengthlangah street play an buatsaih a, lemchan hmangin faina lama inzirtirna an entir. Republic Vengthlang hi Aizawla veng fai zingah a záwnin kum ruk thlan a ni tawh a, chu'ng zinga kum li chu veng fai ber niin, kum hnih dang chu fai ber dawttu an ni.

HBC-ah seminar

Mizoram University-a Department of Psychology leh MZU Psychology Alumni Association chuan November 30, Inrinni khan Hrangbana College-ah 'Contemporary psychosocial issues-II' tih thupui hmangin national seminar an buatsaih. Seminar hi MZU Psychology HoD Prof. HK Laldinpuii Fenate-in a kaihruai a, MZU vice chancellor Prof. KRS Rao khuallian a ni. Seminar-ah hian research paper 36 a lut a, parallel sessions leh presentation-te neih a ni.

MLA-in tlawh

Lunglei North bialtu MLA Dr Vanlalṭanpuia chuan Inrinni khan a bial chhung Haulawng Saichhoh hmuna Horticulture department-in thei chi hrang hrang an enkawlna hmun, Centre of Excellence a tlawh. MLA hi divisional horticulture officer L Lalhmingmawia Pachuau leh project officer JH Zosiamliana ten an hmunhmate fanpuiin, an hnathawh dante an hrilhfiah.

DAWNTISEI

Tihsual hi hlawhchhamna a ni lo, hlawhtlinna kalkawng a ni

ISL kartawp inkhelah chak awm lo

Indian Super League kartawp inkhelah chak an awm lo - Zirtawpni zan khan Hyderabad FC chuan 1-1 in Bengaluru an inhnehtawkpui a, Inrinni zan khan ATK leh Mumbai City chu 2-2 in an inhnehtawk bawk.

R. Laldanmawia'n ISL-a a match hmasa berah Hyderabad tan bul a ṭan a, mahse minute hnihnaa Sunil Chhetri goal sut turin minute 90-naa Robin Singh goal an mamawh. Bengaluru tan bench aṭangin Edmund Lalrindika a lut ve bawk a, danglamna erawh a thlen pha lo.

Inrinni zana ATK leh Mumbai City inkhel hmuhnawmah goal li a lut a, goal hnih hi injury time aṭanga lut a ni - ATK hian Michael Soosairaj hmangin goal hmahruai an khung a, Pratik Chaudhari chuan Mumbai club tan a sut.

Mumbai tan Gabon international Serge Kevyn chuan hun pek belhah goal a rawn khung a, Manchester City nena inzawm thar club hi a chakpuiah a inngai hman - mahse Roy Krishna chuan ATK tan a rawn khung ve leh a, 2-2 in an ṭin.

Share this Post

Login to comment

No Comments