Leimin buaipuinaah Nuai 19.5 boah ngai

PRISM hqrs., Cham-phai district chuan Cham-phaiah thuthar thehdarhtute kawmin, Champhai Kanan Veng leimin thenfaina leh siamnaah cheng nuai 19.5 hmanna hriat loa a bo thu an sawi.

Champhai PRISM-te chuan Kanan Veng leimin thenfai leh siamnaa sum hman dan hi mi tam takin zirchiang tura an ngenna anga bawhzui an nih thu sawiin, "Sum hman dan dik lo hmuhna atan hian RTI hmanga information kan lak bakah hnathawktute kan kawm a ni," a ti.

PRISM hruaitute sawi danin, Kanan Veng leimin buaipuina atan Champhai DC hlui H Lalengmawia hnuaiah sub-committee dinin, member secretary-ah PHE SE Lalrammawia dah a ni. Leimin buaipuina tur DM&R dept. aṭanga cheng nuai 40 lokal chu DC in committee hnenah a bo a bang awm loin a release vek a, heng sum zawng zawng hi hman zawh vek a ni.

Leimin thenfaina atan Rs. 14,69,300; JCB hmanna Rs. 3,29,600 avaiin Rs. 17,98,900 hman ral nia tarlan a ni a, mahse leimin thenfaina atan hian tarmat JCB leh tripper-te petrol leh diesel man bak sen a ni lo.

Labour leh mistiri chhawr dan chu a dik lo hle nia sawiin PRIMS hruaitute chuan, "Labour hi nitin mi 9 vel thawka chawhrual theih a ni a, an hlawh tur chu Rs. 75,600 a nih laiin rangva khuhna lama thawkte hlawh chu DC document-ah Rs. 1,61,000 leh member secretary record-ah Rs. 2,97,150 a ni. Labour hlawhah hian Rs. 60,550 vel bo thlau a awm. Mistiri rawihnaah Rs. 70,200 vel hman tura a nih laiin Rs. 1,15,800 vel hmang angin a inziak a, Rs. 45,600 vel a bo ṭhen a ni," a ti.

PRISM hruaitute chuan sum tih chingpenna hi dik taka chhui chiang tur hnena thlen emaw, High Court a thubuai putluh emawa bawhzui zel an tum thu an sawi.