Chelsea dinhmun a him lo

Champions League khelh tum Chelsea chu an mikhual Hammers lakah 1-0 in an tlawm a, Frank Lampard naute hi palina la ni mek mah se an hnuaiah Tottenham Hotspur an awm avangin an dinhmun a him lo. 

First half-ah goal a luh loh hnuin Aaron Cresswell chuan second half ṭan aṭanga minute thumnaah goal a rawn khung a, Stamford Bridge-ah Chelsea fans an hawihai. 

Chelsea tan Christian Pulisic-a’n chance duhawm a neih chu vawi hnih ngawt holam takin a hlah a, Mateo Kovacic leh Oliver Giroud te hun ṭha neih chu Premier League-a a match hmasa ber kheltu Hammers keeper David Martin chuan ṭha zetin a dang bawk. 

Blues tan Mason Mount-a’n a hun ṭha neih chu a la puitlin tawk loh pholan nan a hmang thei ṭawk a, bench aṭanga luhtir Willian rawn nung viau mah se goal a keng tel bik lo. 

Hammers legend Alvin-a fapa goalkeeper Martin-a’n a club ṭan em em tana Premier League match a khelh hmasak berah clean sheet a nei a, Stamford Bridge-ah a nghing lo. 

Kum 33 mi goalkeeper hi inkhelh zawhah a ṭhing ṭhi hnawk a, a mittui a dang zo lo. Millwall leh MK Dons tana si ban nghak ṭhin hian mipui zinga awm a pa lam a pan zui a, West Ham tana kum 21 lo khel tawh a pa nen hian an inkuah vawng vawng. 

Martin chuan, “Mumang ang mai a ni a, midang tana lawmna ka thlen thei kha ka lawm lehzual. Ka pa khan engvak a sawi lo a, kan mittui a tla ve ve niin ka hria. Kum 21-a lo khelh tawhna club-a a fapain a match hmasa ber khel a, result duhawm a hlawh chhuak kha hmuh a nuam ang,” tiin a sawi. 



Share this Post

Login to comment
No Comments