James Harden-a point 60 score hmangin Houston Rockets chuan Atlanta Hawks 158-111 in an hneh a, NBA regular season kal laiah Rockets hi Western Conference lamah palina an nih chhunzawm.

Nimin zing Toyota Center-a inkhelah Harden hian minute 31 a khelh chhungin point 60 ngawt a nei hman, tun hmain NBA inkhel pakhatah point 61 a lo nei tawh a, match khata point a ngah ber ṭum hi a tluk leh teuh hle.

NBA inkhel pakhatah Harden hian point 60 hi vawi li a neih tlinna a ni a, basketball legend Michael Jordan a nih rual chiah - an chungah hian Wilt Chamberlain (32) leh Kobe Bryant (6) te an la awm thung.

American guard Harden chuan, “Player ropui huangah hian engtik niah emaw chuan ka hming a la chuang ve ang tih ka ngaihtuah ṭhin, ka duhthusam pawh a ni. Beiseina nei mah ila thlen a harsa, an theihna te ang nei phak ve lo mah ila tunah chuan an zingah ka tle ve ta,” a ti.

Houston Rockets hian Nilaini zing dar 7:00-ah San Antonio Spurs an hmachhawn leh ang.

Western Conference lamah Golden State Warriors an che buai chhunzawm. Table mawngphah luahtu hi Inrinni zing khan Miami Heat lakah 122-105 in an chak lo a, season kal laia vawi 16 an chak lohna a ni der tawh! Vawi li chiah chak ni hmel an la hmu ve a ni.

Share this Post