KHAWTHLIR

Dentist Day

Nimin, March 6 kha Dentist Day a ni a, Indian Dental Association, Mizoram State Branch bultumin he ni pual hian vawiinah dental clinic tinah special discount (up to 50%) pek a ni ang.

Buaina siam

Lammuala Chapchar Kut hman zawh takah police-in zurui buaina siam mi 70 vel an man a, an zinga 23 vel chu kumtling lo an ni tih finfiah a nih hnuah chhuah an ni.

Financial campaign

State Bank of India, Lunglei branch chuan Inrinni khan Lunglei I&PR conference hall-ah anmahni dawr ṭhintute pualin financial literacy campaign an buatsaih a, mipuite'n hriat duh an neihte chu SBI hotute an hrilhfiah.

Kawng zawh

Prajapita World Spiritual Organisation, Aizawl Centre buatsaihin nimin zing khan Aizawlah remna leh muanna kawng zawh huaihawt a ni a, Larsap lt. gen. Nirbhay Sharma-in Raj Bhavan kawt aṭangin a vai liam. Kawng hi Ṭhuampui thleng zawh a ni.

Comtt. room hawng

Hunthar Veng YMA committee room sak thar chu Inrinni zing khan bialtu MLA Lal Thanzara'n a hawng a, MLA te chu vote zawng zawng ringawt ni lo, bial chhung ṭhatna tura hma la tur an nih thu a sawi. Committee room sakna atan hian Lal Thanzara hian MLA fund aṭangin cheng nuai hnih leh a pawisa cheng nuai khat a pe a ni.

Thiin chhar

Zirtawpni zan dar 10:30 vel khan Falkland Veng, World Bank road-ah ruang pahnih chhar a ni. Police aṭanga thudawn danin, Lalrinfela (26), Armed Veng South chu khamah a tla a, chhan chhuah tuma kalte'n a tlakna hmun an thlen thlak chuan a thi tawh. Lalrinfela an zawnna lamah hian ruang pakhat chhar a ni a,Inrinni khan Chawngthanmawia (36), Zemabawk tih hriat chhuah a ni. Chawngthanmawia ruang hi tihfel ngaite tihfel a nih hnuah a chhungte hnenah hlan a ni.