Porto tana hattrick siamtu Evanilson

Evanilson chuan Nilaini zan khan Champions League-ah hattrick a siam a, FC Porto chu Royal Antwerp lakah 4-1 in hnehna a chanpui - Nilaini zan Champions League inkhelah Belgian club-in Alhassan Yusuf hmangin goal hmahruai an khung a, Porto an hawihai.

Mahse, bench aṭanga luhtir Evanilson-a'n inkhel hmelhmang a thlak danglam a, minute 46-na aṭanga goal khung ṭanin, 69' leh 84' ah a khung bawk a, hattrick a siam fel der - Evanilson goal khung karah Stephen Eustáquio chuan goal khat a thawh ve bawk.

Evanilson chuan, "Khelmuala ka luh khan goal thum ka khung ang tih rin ngaihna reng reng ka hre lo. Ka mumangah pawh ka mang phak loh a ni a, a ropui takzet. Zaninah hian ka mu thei ang em, ka hre lo," a ti a, Champions League meuha hattrick a siam chu a ngaihlu hle.

Kum 24 mi Evanilson hian tun season-ah Porto tan inelna hrang hrangah match ruk khelin goal ruk a khung ta a, Antwerp laka an chak avang hian group H-ah pahnihna dinhmun an luah zui bawk.

Porto hian match thum khelha la chak vek Barcelona chu an group-a an phak loh a ni a, match thum aṭangin point ruk an nei - an hnuaiah hian point thum neitu Shakhtar Donetsk awmin, Antwerp hi match thum an khelh tawhah an la tlawm vek thung.