SRS ruihhlo man hâl ral a ni

Central YMA hnuaia Supply Reduction Service (SRS)-in ruihhlo an man, Rs. 27,94,200 hû chu Inrinni zing khan CYMA pisa kawtah Law & Judicial minister Lalsawta'n a hâl ral.

Ruihhlo hâlna inkhawmah minister Lalsawta chuan, khawvela inrùnna rapthlak ber chu ruihhlo hmanga inrùn a nih thu a sawi a; ruihhlo hmanga Mizoram rûn a ni mek chu engtia hmachhawn nge an tum tih Mizo mipuite'n an ngaihtuah a ṭul thu sawiin, hlawh beisei loa ruihhlo do kawnga inhmangte harsatna chu sorkarin a sutkian dan a ngaihtuah zel tur thu a sawi.

SRS convener Lalhma-chhuana, CYMA general secretary chuan, ṭhalai leh tleirawlte zingah heroin a hluar thar hle tih sawiin, Excise & Narcotics leh Police-te nen ruihhlo zuar an mante thla hnih khat lek hnua jail aṭanga an chhuak leh ṭhin chu pawi a tih thu a sawi a, "Ruihhlo zuarte na zawka hremna dan neih thuai a ṭul tak zet a ni," a ti.

Ruihhlo hâlna inkhawm hi CYMA vice president Van-lalruata'n a kaihruai a; Law & Judicial Minister chuan

heroin hàwng 28 leh cane 448, alprazolam mûm tam tak leh ganja kg. 1 a hâl ral a ni.

SRS hian April 11, 2015 aṭanga February 19, 2016 thleng khan heroin hawng 166, cane 1,720 leh chhinsen 149, methamphetamine mûm 1,794 leh ganja kg. 4 an man a; ruihhlo an man zawng zawng chu Rs. 9,00,50,600 húa chhût a ni.

Ruihhlo kaihhnawihah mi 1,007 an khawm a, chu'ng zinga mi 825 chu counselling pek hnuah chhuah an ni. Mi 39 chu home leh centre-ah an dah a, mi 74 chu Excise & Narcotics leh Police hnenah an hlan bawk.