Mizoram Premier League Season 8 ṭan hmaa champion tura rinkai ber chu Mizoram Police an ni a, inelna ṭan hnuah erawh Aizawl FC buk a rit ta ber. Zanin dar 7:00 hian team ṭha pahnih hi Lammualah an inhmachhawn dawn. 

Mualpho vawi 3-na?

Tun season-a Mizoram Police hawi san lai ber chu MFA Super Cup an champion ṭum kha a tih theih a, MPL awm (2012) hnua nomawi an chawi hmasak ber niin a hlu lehzual. Lalbiaksanga Colney hote hian I Day Football khel zuiin an match hmasa berah Aizawl FC hian 5-1 in an sawp.

Police-in I Day Football group stage an paltlang thei lo a, MPL-ah erawh bul an ṭan ṭha. An match hmasa berah Chawnpui FC 2-1 in an hneh nghal a, Chanmari FC 3-2 in an hneh leh bawk. Amaherawhchu match thumnaah Aizawl FC an tawng a, 1-0 in an chak lo - mualpho vawi hnihna a ni.

I League club laka an tlawm hnuah club dangin Police an zuam sawt a, vawi khat an inkhelh chhuahin vawi li ngawt an tlawm. Phase 2-ah Police-in ngai an awh chho a, match thum an khelhah chak vekin phase 1 match sariha an point hmuh zat an hmu der tawh.

Man of the match vawi thum ni tawh Malsawmfela leh midfielder R. Malsawmtluanga hoin Police an insiam ṭha a, amaherawhchu Aizawl FC an hmachhawn leh dawn. I League club lakah an chak lo a nih chuan a lungthu kim nan Police an tlawm dawn a, mualpho vawi thumna tiin a sawi theih bawk ang.

Tlarhnung phui

Standly Rosario hnuaiah Aizawl FC khel a nghet ṭha ta hle. I League club hi MPL khel mekah goal 24 khungin goal khung tam ber an ni a, hei aia ropui zawk chu goal thum chauh an chhuah hi a ni. Aizawl FC hian match 10 aṭangin match riatah an clean sheet a, anmahni hnaih bertu Police leh Electric Vengin goal 11 ve ve an chhuah avangin Richard Kassaga kaihhruai 'AFC wall' hi fak loh theih a ni lo.

Zanin hian 'AFC wall' hian Police goal nawr na tak an chelh thei ang em tih hriat a châkawm a, chutihrualin Aizawl FC tlarhma lama awm Alfred Kemah Jaryan, F. Lalremsanga, Isak Vanlalruatfela leh Rochharzela ten Police tlarhnung an tihbuai ngei erawh a rinawm hle.

ROUND 11

Vawiin Inkhel Tur

Ramhlun North04:00 PMFC Venghnuai

Mizoram Police07:00 PMAizawl FC

November 9, Inrinni

Electric Veng FC04:00 PMChawnpui FC

Chanmari FC07:00 PMChhinga Veng FC

#TeamPldWDLGFGAGDPts

1Aizawl FC107302432124

2Mizoram Police106041811718

3Chhinga Veng104512115617

4Electric Veng104331311215

5Chanmari FC104331613315

6FC Venghnuai10244713-610

7Ramhlun North102171025-157

8Chawnpui FC101181129-184

Share this Post