Vanglaini - Inter Village MLA Cup

KHAWTHLIR

AR hotupa leh CYMA inkawm

Assam Rifles 23 Sector DIG Brig. Vinod S chuan nimin khan an hmunah Central YMA hruaitute léngah sáwmin, Mizo ṭhalaite tana an hmalakna hrang hrang a hrilh. Brig. Vinod S chuan, sipai lâk leh turah Mizo ṭhalai tan pre-recruitment an buatsaih thu sawiin, chu'ngte chu puanzarsak turin a ngen. CYMA hruaitute chuan, Mizoram aṭanga Rihdil tlawh turte'n Zokhawthara Assam Rifles-te laka harsatna an tawh ṭhinte enfiah ni se an duh thu, Brig. Vinod S chu an hrilh ve bawk.

Bru Convention

Zanin aṭang hian Damparengpui, Mamit district-ah Home Mission North Bru Convention vawi 4-na neih a ni dawn a, Pathianni zanah a ṭiak ang. Inkhawmpuia thupui tur chu 'Ringtu nun' tih a ni a, speaker tur chu H Lalṭanpuia, Kraws Fate Team a ni ang.

Lusún khawhar

Thangrikhumi (83) w/o C Lalkhawliana, Chanmari, Aizawl chu nimin chhun dar 10:55 khan a thi a, vawiinah an chennaah vui a ni ang. Thangrikhumi hi chanchinbu lamah nasa taka inhmang ṭhin a ni a, a pasal C Lalkhawliana hi Mizorama prominent journalist mi tlemtê zinga mi niin, sap ṭawng chanchinbu Highlander editor leh publisher a ni.

PMMVY sawiho

Nimin khan Lawngtlai DC pisa conference hall-ah Lawngtlai additional DC B Lalchhawntluanga hoin District Level Steering & Monitoring Committee on Pradhan Mantri Matru Vandana Yojana (PMMVY) an ṭhukhawm a; Social Welfare department aiawh te, Chief Medical Officer aiawh, bank hrang hrang aiawhte leh common service centre neitute an tel. PMMVY hi nu leh nausen thihna tihtlemna tura hmalakna a ni a, August 2018 aṭanga kumin October thla thleng khan Lawngtlai district-ah mi 1,046-in PMMVY ṭanpuina an dawng tawh a, chuta tan chuan Rs. 41,45,000 pek a ni.

CEM-in hawng

Mizoram Football Association (MFA) leh Siaha District Football Association (SDFA)-te chuan nimin aṭang khan Siaha District khelmualah Inter-District Women's Football Tournament 2019 an buatsaih ṭan a, MADC chief executive member N Zakhai-a'n a hawng. CEM hian SDFA ṭanpui nan Rs. 20,000 a hlân nghal a ni.

DAWNTISEI

Inter Village MLA Cup

6th Serlui Constituency Inter Village MLA Cup chu bialtu MLA leh sponsor-tu Lalrinsanga Ralte hoin November 6 zan khan kickoff neih a ni a, inelna hi Vairengte Zone Football Association buatsaih a ni.

Inelnaah hian Serlui Constituency chhung Village Council 12 aṭangin team 15 an tel a, nimin khan khelh ṭan niin November 23-ah zawh a ni ang. Champion team hian nuai khat leh trophy an dawng dawn a ni.

Share this Post

Login to comment

No Comments