Vanglaini - Kum ṭha ber a ni

KHAWTHLIR

AR hotupa leh CYMA inkawm

Assam Rifles 23 Sector DIG Brig. Vinod S chuan nimin khan an hmunah Central YMA hruaitute léngah sáwmin, Mizo ṭhalaite tana an hmalakna hrang hrang a hrilh. Brig. Vinod S chuan, sipai lâk leh turah Mizo ṭhalai tan pre-recruitment an buatsaih thu sawiin, chu'ngte chu puanzarsak turin a ngen. CYMA hruaitute chuan, Mizoram aṭanga Rihdil tlawh turte'n Zokhawthara Assam Rifles-te laka harsatna an tawh ṭhinte enfiah ni se an duh thu, Brig. Vinod S chu an hrilh ve bawk.

Bru Convention

Zanin aṭang hian Damparengpui, Mamit district-ah Home Mission North Bru Convention vawi 4-na neih a ni dawn a, Pathianni zanah a ṭiak ang. Inkhawmpuia thupui tur chu 'Ringtu nun' tih a ni a, speaker tur chu H Lalṭanpuia, Kraws Fate Team a ni ang.

Lusún khawhar

Thangrikhumi (83) w/o C Lalkhawliana, Chanmari, Aizawl chu nimin chhun dar 10:55 khan a thi a, vawiinah an chennaah vui a ni ang. Thangrikhumi hi chanchinbu lamah nasa taka inhmang ṭhin a ni a, a pasal C Lalkhawliana hi Mizorama prominent journalist mi tlemtê zinga mi niin, sap ṭawng chanchinbu Highlander editor leh publisher a ni.

PMMVY sawiho

Nimin khan Lawngtlai DC pisa conference hall-ah Lawngtlai additional DC B Lalchhawntluanga hoin District Level Steering & Monitoring Committee on Pradhan Mantri Matru Vandana Yojana (PMMVY) an ṭhukhawm a; Social Welfare department aiawh te, Chief Medical Officer aiawh, bank hrang hrang aiawhte leh common service centre neitute an tel. PMMVY hi nu leh nausen thihna tihtlemna tura hmalakna a ni a, August 2018 aṭanga kumin October thla thleng khan Lawngtlai district-ah mi 1,046-in PMMVY ṭanpuina an dawng tawh a, chuta tan chuan Rs. 41,45,000 pek a ni.

CEM-in hawng

Mizoram Football Association (MFA) leh Siaha District Football Association (SDFA)-te chuan nimin aṭang khan Siaha District khelmualah Inter-District Women's Football Tournament 2019 an buatsaih ṭan a, MADC chief executive member N Zakhai-a'n a hawng. CEM hian SDFA ṭanpui nan Rs. 20,000 a hlân nghal a ni.

DAWNTISEI

Kum ṭha ber a ni - Hamilton

Formula 1 champion Lewis Hamilton chuan season an hman lai chu atan kum ṭha ber nia a hriat thu a sawi a, kum dang aiin champion a nihna nemnghet tlai hret mah se a chet danah a lawm tawk.

Inelna hnuhnung bera hnehna a chan avangin Hamilton hi F1 driver zinga vawi ruk champion thei pahnihna a ni a, inelna tlan hmabak pahnih la nei mah se a elpui driver dang tan umphak theih a ni tawh lo.

Mercedes driver Hamilton chuan, "Nikum khan kawng hrang hranga hmasawnna ka ngah a, chutiang tho chuan kuminah pawh hma lam ka pan. Tun season a danglamna chu a bul ka ṭan ṭhain tlak hniam lutuk lai nei loin ka kal tluang hle a, a hmawr bawkna pawh duhthusam a ni," tiin a sawi.

Pathianni zan dar 10:40 hian Autodromo Jose Carlos Pace-ah Brazilian Grand Prix an tlan dawn a, season khar nan December thla tirah Abu Dhabi Grand Prix an tlan leh dawn bawk.

Share this Post

Login to comment

No Comments