YMA a awm chhung chu Mizoram A zìm belh kan phal lo: CYMA President

YMA kumpuan 'Ram leh hnam humhalh' tih chu February 20, 2016 zan khan Vanapa Hall-ah hawn a ni. Kumpuan hawngtu, Central YMA president Lalbiakzuala chuan, YMA a awm chhung chuan Mizoram a zìm belh an phal dawn loh thu a sawi.

CYMA President chuan, "Miṭhenkhatte'n Mizoram zîmte sah hêk tuma inrêlbâwlna hran ngiatin hma an la mek a, YMA a awm chhung chuan Mizoram zímte hi a zìm belh kan phal dawn lo. He ramah hian kan zavaiin kan leng vek a, tumah inla hrang leh inbáwl hrang zawnga awm loin, inlungrual takin he ramah hian i cheng za ang u," a ti.

Mizoram state puitlinga hlankai a nih aṭanga kum 30 dáwnah pawh ramri chinfel a ni lo chu tu mawhphurhna nge tih inzawh a ngaih thu sawiin, Lalbiakzuala chuan, "Kan ram zímte a zìm belh lohna turin YMA chuan theihtawp kan chhuah dawn," a ti a; Mizoram ramri chu inchi khat pawhin pawhpên an phal lo tih a sawi.

CYMA President chuan, 'Ram leh hnam humhalh' tih chu kumpuan atan kum 10 chhung hman a nih tawh thu sawiin, "He kumpuan kan lo kalpui tawhnaah hian kawng tam takah a hlawhtlinna kan hmuh tawh rualin, a vawi 11 turin chhung lam leh páwn lama aṭanga min tibuaitute avangin kan puang nawn leh a ni. He kumpuan hian kan ram leh hnam chhanchhuahna leh din chhuahna a keng tel a ni tih kan hriat a ngai," a ti.

YMA President sawi danin, electoral roll siamṭhat a nihin Mizoram chhim lam leh khawthlang lamah voter an pung chak bik ṭhin a; chhim lamah chuan Bangladest aṭangin Chakma foreigner lut ru tam tak an awm ṭhin a, pian punna ni lo, dan loa lo lutte vang a ni.

Khawthlang lamah Bru awm ṭha duh lote buaipui mek an nih thu sawiin Lalbiakzuala chuan, "Tuikuk chungchangah pawh hian ngaituahna thar kan sên a hun tawh hle. He rama lo kîr duh lo na nâ nâ chu lo kir lo mai se, an tel loin Mizote hi kan awm thei tih an hriat a ngai," a ti.

CYMA President chuan intodelh chungchang sawiin, "Kan tih ve theih reng kan tih peih loh vangin kan ṭhenawm state-a hnam dangte an lo lut ruih ruih a, kan ram sum tam tak an hawn mek a; a danna turin intodelh a ngai a, kan intodelh loh rah kan seng mek a ni," a ti a; Mizo nula ṭhenkhat, an hmangaih vang pawh ni lo, thatchhiat vanga hnam dang pasal nei an awm mek thu a sawi bawk.

YMA kumpuan hawn in-khawm hi CYMA vice president Vanlalruata'n a kaihruai a, general secretary Lalhmachhuana'n kum-puan thupui a sawi. Aizawla YMA branch tin aṭangin hruaitute an tel a ni.