MPL8 Under 18 Tuten nge semifinal lut dawn?

Mizoram Premier League Season 8 Under 18 league round tawp ber chu vawiin leh naktuk hian khelh a ni dawn a, semifinal lut tur hriatthiam a la har hle. Aizawl FC leh Chhinga Veng ten semifinal an lut tawh a, hmunruak pahnih hnawhkhat tur erawh naktukah a chiang dawn chauh.

AFC leh Chhingcows dawta semifinal lut tura dinhmun ṭha ber chu Ramhlun North an ni a, anni hian league round tawp bera tla tawh FC Venghnuai an hneh chuan semifinal an lut dawn. Hmunruak pakhat hi point riat hmu pathum Chanmari FC, Mizoram Police leh Electric Veng FC ten an inchuh ang.

Team pathum an pathum inkhelh kualnaah an inhnehtawk vek a, chuvangin a pumpui goal difference hi a pawimawh dawn. Chanmari hian goal difference paruk an nei a, goal khung tam an ngaihtuah hmain pahnihnaa awm Chhinga Veng hneh dan an duanchhuah a ṭul dawn a ni.

Electric Veng goal difference hi pakhat chauh nei mah se vawiin tlai dar 1:00-a an khingpui tur Chawnpui hi team dangin goal difference siam ṭhatna atana an hman a ni a. Ramhlun North-in Chawnpui 9-1 zeta an sawp avangin Electric Veng dinhmun a ṭha letling a, Chanmari awm nuam loa awm tirtu tur a ni ang. 

Mizoram erawh naktuk lamah an inlan dawn chauh a, an goal difference a ṭhat tawk loh bakah an khingpui tur Aizawl FC an nih bawk avangin hmabak a harsa dawn. Chutihrualin football-ah theih loh a awm lo a, tun ṭum hi MPL Under 18 league round ngaihnawm ber ṭum a ni hial ang.



Share this Post

Login to comment
No Comments